Dështojnë negociatat mes dy grupimeve brenda PD-së

Në një reagim të grupit të Enkelejd Alibeaj, thuhet se grupi i Sali Berishës ka refuzuar çdo propozim “duke injoruar situatën e rëndë që po kalon Partia Demokratike”.

Statuti i 11 Djetorit, i Komisionit të Rithemelimit duket se ka qenë ngërçi i bisedimeve. Në reagimin e grupit që mbështet Alibeajn, thuhet se këmbëngulja e grupit të Berishës për të njohur këtë statut “ka minuar bisedimet për të gjetur zgjidhje për zgjedhjet lokale”.

“Refuzimi i vazhdueshëm i çdo propozimi të bërë nga ana jonë, përfshirë propozimin final të paraqitur edhe me shkrim, është tregues i mungesës së sinqeritetit dhe vullnetit për të gjetur zgjidhje. Ky refuzim provon paramendimin për të mos gjetur zgjidhje dhe vënien para faktit të kryer të palës tjetër. Kjo bëhet evidente nga fakti që ndërsa palët ishin në bisedime mes tyre, njëra palë vijonte me akte të njëanashme apo me deklarata publike të disa përfaqësuesve politik që shkonin në frymën e nxitjes së dështimit të bisedimeve mes palëve”, shkruhet më tej.

Këtë paradite, grupimi Alibeaj i dërgoi një dokument parimesh grupimit Berisha ku përcaktohej mekanizmi që duhet të përzgjidheshin kandidatët e Partisë Demokratike për zgjedhjet e 14 majit.

Drafti që mbante autorësinë e Gazment Bardhit kërkonte që procesi të mos udhëhiqet nga Sali Berisha, por nga një organ i ri qe quhet Këshilli Drejtues Politik i Partisë Demokratike që ngrihet në mënyrë konsensuale në nivel qendror dhe vendor.

Përzgjedhja e kandidatit të përbashkët për kryetar bashkie propozohej te bëhej përmes një “sistemi pikëzimi” ku 50 për qind e vlerësimit e bënte anëtarësia dhe gjysmën tjetër organi i ri që parashikohet të ngrihet, duke hedhur poshtë në këtë mënyrë parashikimin e statutit të Berishës ku të drejtën e përzgjedhjes së kandidatëve e ka anëtarësia përmes primareve. Por ky propozim është hedhur poshtë nga grupimi Berisha, duke i dhënë kështu fund negociatave mes dy grupimeve.

Fraksion.com