Berisha: Opozita nis protestat për gjendjen në vend

Kryetari i Partisë Demokratike, Sali Berisha deklaroi sot se opozita do të thërrasë protestë më 12 nëntor.

Në një deklaratë për mediet në selinë PD-së, Berisha u shpreh se PD, Partia e Lirisë dhe forca të tjera opozitare nisin më datën 12 nëntor, atë që e cilësoi “betejën e madhe kundër regjimit të urryer, regjimit të narkoshtetit të parë dhe të vetmit në Europë, të partisë-shtet, regjimit të Edi Ramës”.

Ai tha se shqiptarët do bashkohen në protestën më të madhe që ka njohur Shqipëria më 12 nëntor.

“Në të katër anët e Shqipërisë po bien sirenat e urrejtjes ndaj monizmit të Edi Ramës. Po bien sirenat e alarmit ndaj gjendjes katastrofale të krijuar nga vjedhjet e fondeve dhe pasurive publike të qytetarëve shqiptarë. Ka pasur dhe ka një interes të jashtëzakonshëm për protestat dhe përballjen me regjimin e partisë-shtet. Unë kam besimin më të madh se të rinjtë, të rejat e Shqipërisë, që ndodhen në vend dhe ata që janë larguar për shkak të pamundësisë së tyre për të përballuar jetën në Shqipëri, burrat dhe gratë e këtij vendi, do bashkohen në protestën më të madhe që ka njohur Shqipëria më 12 nëntor, për t’i dhënë përgjigjen e merituar, Edi Ramës dhe klikës së tij në pushtet”, tha ai.

Po ashtu, Berisha tha se Rama nuk meriton të qëndrojë në pushtet asnjë ditë.

“Ky është një armik i egër i votës së lirë, ky është një plaçkitës i paskrupullt përmes shtetit elektoral, patronazhistëve të kuq dhe bandave kriminale e parave të drogës. Ky është një armik i egër i interesit të shqiptarëve. Se cili është Edi Rama e ka marrë vesh çdo shqiptar në Shqipëri dhe jashtë. Deklaratat e tij se do zëvendësojë punëtorët shqiptarë me punëtorë të marrë nga Bangladeshi, në të vërtetë trafik i turpshëm i qenieve njerëzore, deklaratat e tij se nuk do lejojë në universitete nxënësit me nota të ulëta, se do marrë jashtë studentë, deklaratat e tij se ikin, por fajin e ka Gjermania, janë dëshmi e zbatimit nga ana e tij të politikës së Vaso Çubrilloviçit. Nga viti 2014 deri më sot, janë larguar nga Shqipëria 27 për qind e materies shqiptare. Nuk ka luftë civile që në një hark kohor të tillë të shkurtër, të ketë larguar nga vendi 27 për qind të kombit apo shoqërisë”, tha Berisha.

Fraksion.com