Çfarë tha media botërore për ‘kaosin politik britanik’, pas dorëheqjes së Truss

Media botërore ka reaguar ndaj dorëheqjes së Liz Truss, kryeministres më jetëshkurtër të Britanisë së Madhe, mes një situate kaotike politike dhe ekonomike për vendin.

”Washington Post” ka paraqitur një strategji se si BM të udhëhiqet pas dorëheqjes së Truss duke pretenduar se vendi po duket gjithnjë e më shumë si një shtet-ishull i izoluar në Atlantik, në vend të një lojtari të rëndësishëm ndërkombëtar.

WP argumenton se konservatorët duhet të zgjedhin një figurë si Rishi Sunak si udhëheqës të ri, i cili thotë se ka të ngjarë të jetë më rezistent se sa Truss ose ish-kryeministrin Boris Johnson.

Sunak u mund nga Truss në garën për t’u bërë kryeministër muajin e kaluar.

“Partia duhet gjithashtu të reformojë mënyrën se si i zgjedh liderët e saj. Procesi aktual fuqizon anëtarët e partisë që paguajnë detyrime, të cilët priren të anojnë më shumë nga e djathta populiste se sa shumica e britanikëve”, shkruan WP.

Hapi i tretë përfshin ndihmën nga SHBA-ja dhe Evropa në arritjen e marrëveshjeve të reja tregtare për një Brexit më të butë.

”BM duhet të jetë më shumë se sa një eksportuese e thashethemeve mbretërore dhe lajmeve të turbullta politike”, thotë gazeta.

“SHBA dhe Evropa duhet të ndihmojnë Britaninë e Madhe të rifitojë vendin e saj në një rend global liberal, nën sulmin e Rusisë, Kinës dhe kundërshtarëve të tjerë të lirisë”, thekson WP.

Editoriali i ”Wall Street Journal” argumenton se rënia e Truss duhet të nxjerrë mësime edhe për politikën e brendshme të SHBA.

Nën titullin “Paralajmërimi i konservatorëve për republikanët amerikanë”, bordi shkruan se Truss “u bë kokë turku për politikat e dështuara të taksave dhe shpenzimeve”.

“Zonja Truss dha dorëheqjen si kryeministre të enjten pas një fiaskoje të një posti kryeministri, por faji nuk është vetëm i saj”, vazhdon ai.

”Ajo po bëhet kokë turku për gabimet e politikës ekonomike që konservatorët në pushtet kanë bërë gjatë 12 viteve në pushtet dhe veçanërisht që nga viti 2019 nën kryeministrin e mëparshëm Boris Johnson”, shton WSJ.

Bordi redaktues ndërkombëtar i ”Financial Times” shkruan për “shkatërrimin e besueshmërisë së BM” dhe bën thirrje për zgjedhje të përgjithshme.

“Gjashtë javët e shkurtra të kryesimit të Liz Truss shkatërruan jo vetëm pozitën ekonomike të BM, por edhe reputacionin e saj për stabilitetin politik”, thuhet në gazetë.

“Askush, me përjashtim të disa mijëra anëtarëve të partisë, nuk ka votuar për këtë”, shtohet në të.

“Perspektiva e një kryeministri tjetër konservator të zgjedhur pa zgjedhje të përgjithshme injoron jo vetëm deficitin demokratik në rritje të BM, por edhe mungesën e kompetencës të shfaqur nga qeveria e saj”, thotë WSJ.

Bordi argumenton se kryeministri i ardhshëm duhet të mbajë Jeremy Hunt si kancelar për të “riparuar dëmin” nga një “granatë dore financiare”, por vazhdon se “konservatorët nuk duhet të lejohen të vazhdojnë pa një mandat të ri nga votuesit”.

Në Australi, në prag të dorëheqjes së Truss, një editorial nga ”The Australian”, në pronësi të Murdoch, deklaroi se konservatorët kishin hapur rrugën për një qeveri laburiste.

Gazeta thotë se “si një fuqi me ndikim dhe anëtare kyçe e aleancës perëndimore, BM meriton dhe ka nevojë për më mirë”.

”Paqëndrueshmëria ekonomike dhe politike e shkaktuar nga Truss dhe partia e saj ka qenë shumë e dëmshme. Ajo u ka dhënë laburistëve një rrugë drejt pushtetit që nuk e kanë pasur prej shumë vitesh”, përfundon gazeta.

Në Evropë, kryetitulli i së përditshmes së njohur daneze ”Jyllands-Posten” ishte “Nga triumfi në shkatërrim”