“Qeveri dhe kryeministër shumë i dobët”, Bamir Topi: Rama mbulon skandalet në vend me takime me personalitete botërore

Këtë të shtunë në emisionin “Kjo Javë” me Nisida Tufa, i ftuar ishte ish-presidenti i vendit, Bamir Topi, i cili foli ndër të tjera për situatën aktuale politike në vend. Bamir Topi u shpreh ndër të tjera nuk sheh qeveri, por duket më shumë si pushteti i kryeministrit, pasi prej kohësh në politikë nuk ka ekip.

Ai e ka quajtur qeverinë dhe kryeministrin “të dobët” duke thënë se “përveç ekstravagancës në komunikim nuk të ofron asnjë besim për të udhëhequr Shqipërinë në sfida më të forta”.

“Një qeveri e dobët, në mënyrë absolute shumë e dobët, një kryeministër shumë i dobët, që përveç ekstravagancës në komunikim nuk të ofron asnjë besim për të udhëhequr Shqipërinë në sfida më të forta, që është aktor minor, që tenton të mbulojë skandalet në vend përmes takimeve me personalitete botërore, kjo është arsyeja që them se performaca është personalizuar, dhe kjo qeveri ka atë që i mungon Shqipërisë, transparencë”, tha ai.

Sipas Topit, një qeverisje tjetër që do ishte përfshirë në kaq shumë skandale që është përfshirë qeveria e Ramës, do të ishte larguar.

“Nëse do më pyesni se cila është arsyeja se edhe sezoni i verës ka qenë i mbushur me politikë, tregon se aktorët kryesorë politik, nuk mendojnë në mënyrë të ftohtë, për të ndjekur secili atë rregullin e jetës, por mendojnë si të projektojnë të ardhmen e tyre në pushtet. Një vend që ka inflacion ligjërimesh politike, në atë vend gjërat nuk shkojnë mirë. Unë si një aktor i vjetër i politikës, e kam parë këtë verë politike si njerëz që janë në hall. Por nëse shkon përtej deklaratave dhe sinqeriteti i tyre,  shihet se halli i tyre nuk është halli i njerëzve.

Kur gjërat nuk funksionojnë, atëherë gjërat do të mbulohen me zhurmë.

Së pari do rezervohem shumë nëse do e quaj qeveri apo pushteti i kryeministrit, sepse ka vite që në politikë nuk shohim ekip. Kjo e keqe Shqipërisë ka nisur t’i vijë në 2008, sot Berisha të bërtasë si të dojë, Berisha nuk bind më njeri, sepse nëse ka një përgjegjës për atë që Rama demonstron sot, është Berisha. Ramën me këtë pushtetet e ka prodhuar Berisha me ndryshimet kushtetuese të 2008”, tha ai.

Fraksion.com