Mbi 30 mijë litra karburant kontrabandë bllokohen në det. Peshkarexha në pronësi të dy vëllezërve nga Kavaja
Një anije peshkimi me mbi 30 mijë litra karburant kontrabandë është bllokohet në det të hapur gjatë natës së kaluar.
Peshkarexha e bllokuar është në pronësi të Roland dhe Shpëtim Cani (vëllezër), të cilët janë shoqëruar në polici. Gjithashtu është ndaluar edhe marinari Ervin Hasani.
Paraprakisht deklarohet se anija “Leone”, që i përket dy vëllezërve nga Kavaja është konstatuar në ujërat ndërkombëtare nga Guardia di Finanza, e cila ka njoftuar autoritetet shqiptare.
Gjatë natës së kaluar policia kufitare është vënë në lëvizje duke e sjellë në port peshkarexhën, ndërsa po vijon vlerësimi i sasisë së karburantit që dyshohej se do të hidhej në treg kontrabandë, pas blerjes në Liban.
Anija kishte dalë për gjueti në datën 5 shtator në drejtim të jugut dhe kur ka dalë në ujërat ndërkombëtare ku dyshohet se ka marrë dhe sasinë e naftës nga një anije libaneze, veprim ky i pikasur nga Guardia di Finanza.
Më 23 korrik një tjetër anije peshkimi, “Anyway” me 72 mijë litra karburant në bord u sekuestrua në kalatën e ish-kantierit detar në portin e Durrësit, ndërsa u arrestuan kapiteni dhe motoristi i anijes.
Ata kishin lundruar drejt Bengazit në Liban ku ishin furnizuar me karburant, që dyshohej se do të hidhej në treg kontrabandë për qëllime fitimi.
Çmimi i lartë i naftës në vendin tonë dyshohet se ka aktivizuar tregtinë e karburantit të blerë kontrabandë në Liban, ku në verë çmimi i karburantit, sipas deklaratave të peshkatarëve, ishte 0,25 dollarë për litër.
