Rusia nis stërvitje ushtarake me Kinën dhe Indinë
Rusia ka nisur stërvitjet e mëdha ushtarake në lindje të vendit. Në këto stërvitje po marrin pjesë edhe forca nga Kina dhe pjesëmarrja e tyre po shihet si rritje e lidhjeve në aspektin e mbrojtjes midis Pekinit dhe Moskës, në mes të tensioneve me Perëndimin lidhur me luftën në Ukrainë.
Stërvitjet Vostok 2022 po mbahen në disa lokacione në Lindjen e Largët të Rusisë dhe në Detin e Japonisë dhe po marrin pjesë mbi 55.000 trupa, mbi 5.000 njësi armësh, përfshirë 140 avionë dhe 60 luftanije, tha Ministria ruse e Mbrojtjes.
Stërvitjet do të përmbyllen më 7 shtator.
Në këto stërvitje po ashtu janë përfshirë edhe trupat nga India, Laosi, Mongolia, Nikaragua, Siria dhe të disa shteteve ish-sovjetike.
India vazhdon të shprehë qëndrim neutral sa i përket luftës së Rusisë ndaj Ukrainës dhe ka argumentuar se mban raporte të mira edhe me Perëndimin, edhe me Moskën.
Kina ka refuzuar që ta kritikojë luftën e Rusisë në Ukrainë dhe ka fajësuar Shtetet e Bashkuara dhe NATO-n për provokim të Moskës. Pekini po ashtu ka dënuar sanksionet perëndimore të vendosura ndaj Moskës.
Rusia, në anën tjetër, mbështet fuqishëm Kinën në mes të tensioneve në rritje me SHBA-në, pas vizitës në Tajvan të kryetares së Dhomës së Përfaqësuesve, Nancy Pelosi.
Presidenti rus, Vladimir Putin, së fundmi ka tërhequr paralele midis mbështetjes së SHBA-së për Ukrainën dhe vizitës së Pelosit në Tajvan. Ai tha se këto dy gjëra ishin pjesë e përpjekjeve amerikane për të krijuar jostabilitet në botë.
Fraksion.com
