“Ngjarje delikate”, regon Rama për sulmin ndaj ushtarëve në Gramsh: Gjelat laramanë ia marrin avazit majë plehut

Kryeministri Edi Rama iu dha përgjigje mbëmjen e sotme zërave nga opozita që kërkuan reagimin e tij për incidentin e ndodhur pasdite në Uzinën ushtarake të Gramshit, ku tre shtetas të huaj tentuan të hynin në territorin e saj.

“Çfarë trishtimi që edhe kur bëhet fjalë për një ngjarje kaq delikate sa ajo e Gramshit, gjithëfarë gjelash laramanë ia marrin avazit majë plehut të interesave të tyre mizerabël! Po edhe çfarë krenarie për rojet ushtarake që i neutralizuan tre individët e dyshuar për spiunazh!”, shkroi Rama në një postim në rrjetet sociale.

“Shërim të shpejtë të lënduarve dhe tani të presim zbardhjen e plotë të kësaj ngjarjeje!”, theksoi Kryeministri Rama.

Sipas njoftimit nga MM, 3 shtetas me pasaporta ruse dhe ukrainase kanë tentuar të hyjnë në uzinë. Menjëherë kanë reaguar efektivët që ishin në ruajtje të uzinës, por gjatë përpjekjeve për t’i ndaluar 3 shtetasit e huaj janë lënduar dy ushtarakët tanë, të cilët janë nën kujdesin e mjekëve në spitalin e Traumës në Tiranë.

Shtetasit e huaj janë ndaluar nga autoritetet, ndërsa vijojnë hetimet për të zbardhur rrethanat e ngjarjes.

Fraksion.com