“Të metat e Rusisë”; Raporti i Inteligjencës së Ukrainës: Armët e Kremlinit janë të vjetra dhe të dështuara, vetëm 33% shanse që të godasin objektivat

Armët e Rusisë janë “të paefektshme” dhe “të vjetruara”, me automjete të blinduara dhe helikopterë të paaftë për t’i bërë ballë zjarrit të armëve të vogla dhe raketave që kanë vetëm 33% shanse për të goditur objektivin e tyre.

Kështu theksohet në një raport të brendshëm të qeverisë ukrainase. Dosja është përpiluar nga Ministria e Mbrojtjes së vendit dhe e parë nga “The Times”, me median që raporton se në të pretendohet se armët ruse të marra nga fusha e betejës nuk janë të besueshme dhe nuk plotësojnë kërkesat moderne.

Zyrtarët ukrainas të mbrojtjes deklarojnë gjithashtu në raport se Rusisë i duhet të pezullojë kontratat e armëve milionëshe me kombet e tjera për shkak të sanksioneve ose nevojës për të rimbushur humbjet e pajisjeve luftarake në Ukrainë.

Mbrojtja e blinduar e helikopterit sulmues Ka-52 Alligator – një nga më modernët e Rusisë – mund të shpohet me armë të vogla 7.62 mm, pretendon dosja, duke ofruar imazhe të dëmtimit të një prej helikopterëve.

 

 

“Moska e quan këtë helikopter një ‘tank fluturues’, kabina e blinduar e të cilit mund të përballojë goditjen e plumbave të kalibrit 12.7 mm dhe pjesa tjetër e komponentëve janë të mbrojtur në mënyrë të besueshme. Megjithatë, siç rezultoi në praktikë, Ka-52 mund të çaktivizohet me një mitraloz 7.62 mm”, thuhet në një version të përkthyer të dokumentit.

Ekspertët vlerësuan efektivitetin e raketave të Rusisë në territorin ukrainas. Raporti pretendon se raketa e lundrimit me bazë detare 3M-14 Kalibr ka vetëm 33% shanse për të goditur objektivin e saj. Rreth 30% e raketave të përdorura goditën objektet civile.

Një tjetër raketë thuhet se ka një saktësi prej vetëm 49%. Rusia lëshoi ​​80 raketa Grad gjatë natës në qytetin e Marhanets, pranë një termocentrali të mbajtur prej tyre në rajonin Dnipropetrovsk në Ukrainën qendrore. Nga sulmet u vranë 13 civilë dhe u plagosën 11 persona.

“Ishte një natë e tmerrshme”, hkroi Valentin Reznichenko, guvernatori rajonal, në Telegram, duke u kërkuar banorëve të strehohen kur të dëgjojnë sirenat e sulmit ajror.

“Unë po ju kërkoj dhe ju lutem … mos lejoni që rusët t’ju vrasin”, tha ai, duke shtuar se më shumë se 20 ndërtesa janë dëmtuar.

BM-21 Grad, që do të thotë “breshër” në rusisht, është një sistem rakete me shumë lëshime, i aftë të lëshojë 40 raketa në më pak se 20 sekonda. Ai konsiderohet më pak i saktë se disa nga raketat e tjera të Rusisë, por i aftë për të shkaktuar shkatërrim të konsiderueshëm në zonat me ndërtime.

Raporti shton se kamioni Ural-63706-0010 Tornado-U, i projektuar për të transportuar armë dhe pajisje ushtarake, ka për qëllim të ketë mbrojtje të zgjeruar të blinduar, por ka “mbrojtje të dobët kundër dëmtimit nga armët e vogla”, duke i detyruar trupat në terren të improvizojnë me metoda të tjera, sipas ministrisë së Mbrojtjes.

Automjeti luftarak i këmbësorisë amfibe BMD-4M, i cili mund të hidhet nga parashutistët për të siguruar fuqi zjarri dhe mbështetje, ka “mbrojtje të dobët kundër armëve të vogla dhe fragmenteve të minave dhe predhave të artilerisë”, ndërsa rreth një duzinë prej tyre janë konfirmuar se janë kapur nga forcat ukrainase.

Tanket e modernizuara T-72B3, tanku kryesor luftarak i Rusisë, transportuesit e personelit të blinduar BTR-82A dhe automjetet e tjera të blinduara janë shkatërruar me sukses nga trupat ukrainase duke përdorur armë antitank të dhuruara nga Perëndimi.

Në raport ngrihen gjithashtu diskutime mbi dronët që po përdornin rusët. Kjo pasi, mjeti ajror pa pilot Orlan-10 thuhet se përbëhet nga një numër i madh komponentësh nga kompani të huaja që “dështojnë shpejt”.

“Droni me bateri Eleron-3SV ka një kamerë Olympus që ka specifika më të këqija se një aparat fotografik Sony nga një pajisje e ngjashme e prodhuar në Korenë e Veriut”, vëren raporti.

Sistemi raketor anti-ajror i Rusisë Pantsir-S1 nuk është në gjendje të luftojë tufat e dronëve dhe i mungon mbrojtja kundër sulmeve ajrore. Një burim ukrainas i mbrojtjes shtoi se ushtria ukrainase po dërgonte dy drone për qëllime shpërqendrimi dhe tre për të goditur objektivat, të cilat sistemi rus nuk ishte në gjendje t’i përballonte.

“Si pasojë e sanksioneve perëndimore dhe nevojës për të zëvendësuar pajisjet e shkatërruara në Ukrainë, qeveria ruse është detyruar të ndërpresë kontratat e armëve”, shton raporti.

Në mars Moska pezulloi kontratën për dërgimin e dy helikopterëve Ka-32 në Serbi. Në maj dhe qershor Rusia informoi Algjerinë për vonesat në ekzekutimin e kontratave për furnizimin me pajisje ushtarake, duke përfshirë avionët amfibë dhe pajisjet softuerike.

“Në korrik, ministria e Mbrojtjes propozoi ndërprerjen e kontratës për furnizimin e dronëve Orlan-10 në Mianmar dhe pagesën e kompensimit. Ajo gjithashtu ofroi të shtyjë furnizimin e katër avionëve luftarakë Su-30SME, dy sistemeve të mbrojtjes ajrore Pantsir-S1 dhe një sistemi radar”, thuhet më tej në raport.

Rusia gjithashtu informoi Vietnamin për pezullimin e furnizimit të sistemeve të artilerisë dhe sistemeve raketore antitank, si dhe paaftësinë e saj për të ndërtuar helikopterë të lehtë Kazan Ansat për shkak të sanksioneve ndërkombëtare.

Moska po vonon fillimin e zbatimit të një kontrate për armët e sulmit AK-203 në Indi dhe kontratat për furnizimin e Kazakistanit dhe Bjellorusisë me pajisje për sistemin raketor anti-ajror Tor-M1 janë gjithashtu “në rrezik dështimi”.

Rusia vazhdoi të pësojë humbje të mëdha dje, me forcat ajrore të Ukrainës që pretenduan se 9 avionë rusë u shkatërruan në një sulm mbi një bazë ajrore në Krimenë e pushtuar.

“SAKI [emri i bazës ajrore]! Minus nëntë nga avionët e pushtuesit’, postoi Komanda e Forcave Ajrore të Ukrainës në Facebook sot pa dhënë detaje të mëtejshme.

Zëdhënësit zyrtarë të ushtrisë vazhduan të refuzonin të konfirmonin ose mohonin një sulm, por mediat amerikane raportuan se burime anonime ukrainase kishin marrë kredite për sulmin.

“Kjo ishte një bazë ajrore nga e cila avionët ngriheshin rregullisht për sulme kundër forcave tona në zonën jugore”, tha një zyrtar ukrainas për Neë York Times.

Zyrtari nuk do të zbulonte llojin e armës së përdorur në sulm, duke thënë vetëm se “u përdor një pajisje ekskluzivisht e prodhimit ukrainas”.

Një zyrtar tjetër tha për The Washington Post se sulmi ishte kryer nga forcat speciale ukrainase, ndërsa Inteligjenca ushtarake ukrainase dhe operativët e forcave speciale nuk e konfirmuan këtë informacion.

Sulmi kishte çuar në spekulime se Shtetet e Bashkuara i kishin dhënë Ukrainës raketa “ATACMS”, me një rreze veprimi prej 300 km për t’u përdorur kundër sistemeve “HIMARS”.

Instituti për Studimin e Luftës hodhi hipotezën se raketat e përshtatura “Neptun”, lloji i përdorur në prill për të fundosur “Moskva”, anijen kryesore të marinës ruse, ishin lëshuar në drejtim të bazës ajrore.

Imazhet satelitore nga mëngjesi para sulmit treguan të paktën 30 avionë rusë në pistë, në afërsi të karburantit dhe municioneve të ekspozuara.

 

Fraksion.com