Rezistencë e lëvizjes ekologjike ndaj kthimit te qymyri

Ky është një nga lajmet më të hidhura me të cilat duhet të përballen mbrojtësit e klimës këto ditë: qeveria gjermane mbështet qymyrin që dëmton klimën për të luftuar krizën e gazit. Dhe është pikërisht një ministër i Gjelbër ai që i bie kambanës për kthimin e qymyrit. “Nuk është një hap që unë e bëj lehtë, por është një hap i domosdoshëm që ne e bëjmë tani”, tha Robert Habeck. Objektivi: të kursehet gazi duke prodhuar, për shembull, energji elektrike nga qymyri dhe jo nga gazi.

Si të kompensohen emetimet e CO2?

Disa mbrojtës të klimës e kuptojnë vendimin e Habeckut. “Po ta shohim tani qymyrin si një mënyrë shumë afatshkurtër për të kaluar dimrin e ardhshëm, është e dhimbshme për ne, por është një opsion i pranueshëm,” thotë Pauline Brünger nga Fridays for Future.

“Për sa kohë që ne mendojmë, si një qeveri federale, se si të kompensojmë drejtpërdrejt këto emetime shtesë.” Dhe pikërisht këtu merr fund mirëkuptimi për ministrin. Sepse më shumë qymyr ndoshta do të thotë më shumë emetime CO2.

“Ajo që më jep një ndjesi të pakëndshme është se nuk ka absolutisht asnjë plan për t’i kursyer në plan afatgjatë emetimet shtesë. Pra, kjo nuk është diçka që ne mund ta përballojmë në politikën klimatike,” thotë Brünger.

Shkatërrimi i natyrës

Për organizatën rinore të Federatës Gjermane për Mbrojtjen e Mjedisit dhe Natyrës, vënia në punë e termocentraleve me qymyr është një makth, pjesërisht për shkak të emetimeve, pjesërisht për shkak të shkatërrimit të fshatrave dhe peizazheve këtu dhe në mbarë botën.

“Ne tashmë po i përjetojmë pasojat e ndryshimit klimatik dhe e dimë se duhet të kishim vepruar dje. Dhe nuk mund të lejojmë që tani, në një reagim të shpejtë ndaj një krize tjetër, të djegim më shumë qymyr”, shpjegon Alexandra Struck, anëtare e Komitetit Drejtues Federal. “Qymyri është në fakt një burim energjie që duhet të ishte braktisur prej një kohë shumë të gjatë”.

Përqendrim në kursimin e energjisë

Koalicioni qeveritar duhet të fokusohet shumë më tepër në kursimin e energjisë, kërkojnë mbrojtësit e rinj të klimës. Jo në formën e thirrjeve të Habeckut për të bërë vullnetarisht më pak dush, por në formën e kërkesave të qarta ligjore – për industrinë dhe konsumatorët.

“Duhet të kursejmë energji. Sepse energjia më e qëndrueshme është ajo që nuk prodhohet”, thotë Struck. Ajo dhe shumë në lëvizjen për mbrojtjen e klimës janë të zhgënjyer me qeverinë federale.

“Të Gjelbrit ishin të fundit që prisja të merrnin këtë rrugë. Por gjithashtu prisja plotësisht të merrnin përgjegjësitë e tyre për brezat e ardhshëm edhe një SPD ose një FDP “.

Lëvizja për mbrojtjen e klimës paralajmëron protesta të reja

Dhe ky zhgënjim ka pasoja: euforia që pasoi zgjedhjet e Bundestagut sipas Struck është zhdukur. Në vend të kësaj, po përhapen zhgënjim dhe pakënaqësia, vëren ajo.

“Nuk dua të di se çfarë ndodh me të rinjtë që dalin në rrugë me vite për të mbrojtur interesat e tyre, çfarë ndodh me ta nëse ende nuk dëgjohen dhe nuk angazhohen politikisht. Mund të bëhet tashmë e rrezikshme për një demokraci kur e humbet rininë’.

Shumë njerëz në lëvizjen për mbrojtjen e klimës nuk duan më të presin. Fridays for Future (Të Premtet për të Ardhmen) po bëjnë thirrje për protesta. Nga fundi i shtatorit ata planifikojnë të dalin sërish me protestën e tyre në rrugë./DW