“Rreziku nga digat”; Prefekti i Korçës Jole, thirrje bashkive: Ushtroni detyrimet qe iu ngarkon ligji

Projektet në funksion të rehabilitimit e mirëmbajtjes teknike të digave, si dhe domosdoshmëria për plane konkrete në rast emergjencave civile të shkaktuara prej tyre, ishte në qendër të takimit të organizuar në Korçë nga prefekti i qarkut Nertil Jole, me drejtues e përfaqësues të bashkive të qarkut dhe ata të drejtorive rajonale të ujitjes e kullimit, ku i pranishëm ishte edhe Kryetari i Komitetit të Digave të Mëdha, Arjan Jovani. Ai theksoi si problematikë mungesën e matjeve të detyruara që duhet të kryejnë Bashkitë çdo 5 vjeçar, për të evidentuar volumin e ujit tek rezervuarët.

Në takim u evidentua fakti se në disa bashki informacioni për monitorimin e digave nuk është i plotë, apo në rastin më të keq mungon, gjë që sjell nënvlerësimin e pasojave që mund të shkaktohen nga vlerësimi jo i saktë i rrezikut që shkaktojnë digat në dëmtimi apo mbingarkese për shkak të reshjeve.

Prefekti i Qarkut Nertil Jole u shpreh se infrastruktura e digave është një nga pasuritë më të mëdha të shtetit shqiptar, ndaj mirëmbajtja dhe siguria e tyre nuk është thjesht një detyrim ligjor, por edhe një domosdoshmëri jetike. Ai iu kërkoi bashkive të ushtrojnë detyrimet që iu ngarkon ligji, për mirëmbajtjen e digave me qëllim parandalimin e rreziqeve.

Në Qarkun e Korçës janë nën administrim rreth 120 rezervuarë ujëmbledhës, prej të cilëve 43 të digave të mëdha. Bashkia e Korçës ka në administrim 25 rezervuarë, 9 prej tyre me diga të mëdha, Bashkia Maliq 3 diga të mëdha, Bashkia Devoll 9 diga të mëdha, Pogradeci 13 rezervuar me diga të mëdha ndërsa Bashkia Kolonjë 7 të tilla.

Fraksion.com