Presidenti francez do të diskutojë krizën ushqimore gjatë turneut në Afrikë

Presidenti francez Emmanuel Macron pritet të diskutojë mungesën e ushqimit të shkaktuar nga lufta në Ukrainë gjatë vizitës së tij katër-ditore në Kamerun, Benin dhe Guinea-Bissau, tha një zyrtar nga Pallati Élysée.

“Pasojat e luftës në Ukrainë ndjehen fuqishëm në kontinentin afrikan, i cili është shumë i varur nga eksportet bujqësore ukrainase”, tha zëdhënësi.

“Udhëtimi do të jetë një mundësi për të forcuar qëndrueshmërinë tonë kolektive ndaj krizave ushqimore dhe për të promovuar investimet afatgjata në bujqësi në vendet e cenueshme, veçanërisht në Afrikë.”

Macron do të takohet të martën me presidentin 89-vjeçar të Kamerunit, Paul Biya. Ky është udhëtimi i parë i një presidenti francez në vend që nga viti 2015.

Kujtojmë se Kombet e Bashkuara kanë paralajmëruar se deri në 49 milionë njerëz mund të shtyhen në uri ose kushte të ngjashme me urinë për shkak të ndikimit shkatërrues të luftës në furnizimin dhe çmimet globale të ushqimit.

Gjatë turneut të tij – i cili filloi të hënën – Macron do të flasë gjithashtu për sigurinë dhe kërcënimin terrorist që vazhdon të përhapet në të gjithë Sahelin dhe Afrikën Perëndimore.

Ministri i Jashtëm rus Sergej Lavrov po viziton gjithashtu Afrikën, duke shpresuar të kërkojë mbështetje mes zemërimit global për krizën ushqimore pas bllokadës së Moskës ndaj porteve ukrainase. Ai ka vizituar Egjiptin – importuesi më i madh në botë i grurit – dhe Republikën e Kongos.

Fraksion.com