Stabiliteti strategjik; Nënsekretarja e SHBA për Kontrollin e Armëve dhe Sigurinë Ndërkombëtare vizitoi selinë e NATO-s

Aleatët e NATO-s ndajnë pikëpamjet mbi kontrollin e armëve dhe stabilitetin strategjik me nënsekretarin e SHBA-së për Kontrollin e Armëve dhe Sigurinë Ndërkombëtare

Sot (11 korrik 2022), ambasadorja Bonnie Denise Jenkins (nënsekretarja e SHBA për Kontrollin e Armëve dhe Sigurinë Ndërkombëtare) vizitoi selinë e NATO-s, ku u takua me Zëvendës Sekretarin e Përgjithshëm të NATO-s, z. Mircea Geoană, dhe Aleatët e NATO-s në kuadër të Komitetit Special Këshillues dhe Konsultativ të Kontrollit të Armëve, Çarmatimit dhe Mospërhapjes (ADNC)..

Diskutimet u fokusuan në tre tema kryesore: (1) Kontrolli i Armëve në kontekstin e luftës së agresionit të Rusisë dhe të Konceptit të ri Strategjik të NATO-s, i cili u miratua në Samitin e Madridit; (2) përgatitjet e vazhdueshme për Konferencën e Dhjetë të Rishikimit të Traktatit për Mospërhapjen e Armëve Bërthamore (NPT) që do të mbahet në gusht 2022; dhe (3) Përpjekjet dhe prioritetet e SHBA-së në kontrollin e armëve dhe sigurinë ndërkombëtare.

Në Samitin e Madridit, udhëheqësit e Aleatëve ripohuan se stabiliteti strategjik – i ofruar përmes parandalimit dhe mbrojtjes efektive, kontrollit të armëve dhe çarmatimit, dhe dialogut politik kuptimplotë dhe reciprok – mbetet thelbësor për sigurinë tonë të përbashkët. Rezultatet e mëtejshme të Samitit përforcuan rëndësinë e kontrollit të armëve, çarmatimit dhe mospërhapjes për reduktimin e rrezikut dhe rritjen e sigurisë, transparencës, verifikimit dhe pajtueshmërisë. Aleatët riafirmuan gjithashtu angazhimin e tyre për të vazhduar ndjekjen e të gjithë elementëve të reduktimit të rrezikut strategjik, duke përfshirë mjetet që promovojnë ndërtimin e besimit dhe parashikueshmërinë përmes dialogut, rrisin mirëkuptimin dhe vendosin menaxhimin dhe parandalimin efektiv të krizës. NATO mbetet një platformë e rëndësishme për diskutime të thella dhe konsultime të ngushta mbi këto dhe përpjekjet e lidhura me to.

Fraksion.com