Finlanda dhe Suedia përfundojnë bisedimet e anëtarësimit në NATO

Finlanda dhe Suedia përfunduan bisedimet e pranimit në selinë e NATO-s në Bruksel të hënën (4 korrik 2022), siç u ra dakord javën e kaluar nga krerët e NATO-s në Samitin e tyre në Madrid. Të dy vendet konfirmuan zyrtarisht vullnetin dhe aftësinë e tyre për të përmbushur detyrimet dhe angazhimet politike, ligjore dhe ushtarake të anëtarësimit në NATO.

Bisedimet u zhvilluan midis zyrtarëve të NATO-s dhe përfaqësuesve nga Finlanda dhe Suedia. Delegacioni finlandez u kryesua nga ministri i Jashtëm Pekka Haavisto dhe ministri i Mbrojtjes Antti Kaikkonen, delegacioni suedez u kryesua nga ministrja e jashtme Ann Linde. Takimet për secilin vend u kryesuan nga Ndihmës Sekretari i Përgjithshëm i NATO-s për Çështjet Politike dhe Politikën e Sigurisë, Bettina Cadenbach.

Pas përfundimit të bisedimeve, aleatët do të nënshkruajnë Protokollet e Aderimit për Finlandën dhe Suedinë në selinë e NATO-s të martën (5 korrik 2022). Protokollet e anëtarësimit më pas do t’u shkojnë të gjitha vendeve të NATO-s për ratifikim, sipas procedurave të tyre kombëtare.

Fraksion.com