Alibeaj për Presidentin: Kemi marrë pjesë në proces, të jetë i shqiptarëve
Presidenti duhet të jetë i shqiptarëve, tha sot kreu i grupit parlamentar të PD-së, Enkelejd Alibeaj pas seancës plenare ku u ezaurua pa kandidat dhe raundi i dytë i votimit për zgjedhjet e Presidentit të Republikës.
Duke folur për mediet pas seancës plenare në Kuvend, Alibeaj deklaroi se opozita në mënyrën më fisnike ka marrë pjesë në proces.
“Detyrimi i parlamentit është t’i japë legjitimitetin e duhur atij që do të jetë President i Republikës. Detyrimi ynë është sot, çfarë kemi bërë ne? Në mënyrën më fisnike kemi marrë pjesë në proces, kemi dhënë kontributin tonë për një president që të jetë mbi palët”, tha Alibeaj.
“Nuk ka nevojë të jetë tango, duhet të jetë president i shqiptarëve”, shtoi ai, duke reaguar ndaj deklaratës së Kryeministrit Rama po pas seancës plenare.
Kreu i grupit parlamentar të PD-së, Enkelejd Alibeaj sqaroi se përse opozita u dakordësua për të propozuar kandidatë për president, gjatë negociatave me PS-së.
Fraksion.com
