Qëllohet për vdekje gazetarja në Bregun Perëndimor
Gazetarja e Al Jazeera, Shireen Abu Akleh u qëllua për vdekje ndërsa ishte në detyrë në Bregun Perëndimor të mërkurën, tha rrjeti.
Ministria palestineze e Shëndetësisë tha se ajo u qëllua në kokë nga një plumb i vërtetë në Jenin dhe konfirmoi vdekjen e saj menjëherë më pas. Një gazetar i dytë, Ali Al Samudi, gjithashtu u qëllua dhe është në një gjendje të qëndrueshme, tha ministria.
Al Jazeera ka akuzuar forcat izraelite të sigurisë për shënjestrimin dhe vrasjen e qëllimshme të Abu Akleh dhe i bëri thirrje komunitetit ndërkombëtar që të dënojë dhe të mbajë përgjegjës Izraelin.
Forcat e Mbrojtjes së Izraelit thanë se forcat e saj të sigurisë kishin operuar në zonë “për të arrestuar të dyshuar për aktivitete terroriste” dhe të dyshuarit palestinezë dhe forcat izraelite po qëllonin në atë kohë.
“Si pjesë e aktivitetit në kampin e refugjatëve Jenin, të dyshuarit qëlluan fort mbi forcën dhe hodhën eksplozivë. Forca u përgjigj duke gjuajtur. U zbuluan goditje,” tha IDF.
“Mundësia që gazetarët të jenë goditur, ndoshta nga të shtënat palestineze, është duke u hetuar. Ngjarja po shqyrtohet”, shtoi IDF.
Gazetari i Al Jazeera, Al-Samudi, i cili ishte me Abu Akleh kur ajo u vra, tha se nuk kishte asnjë person të armatosur palestinez në zonë në atë kohë. “Ushtria izraelite na qëlloi,” tha Al-Samudi i cili gjithashtu u qëllua. “Nuk kishte asnjë person të armatosur palestinez në vend.”
Në përgjigje të të shtënave, Ministri i Jashtëm izraelit Yair Lapid tha në Twitter se qeveria e tij kishte ofruar të kryente një hetim të përbashkët izraelito-palestinez, duke shtuar: “Gazetarët duhet të mbrohen në zonat e konfliktit dhe ne të gjithë kemi përgjegjësi për të arritur tek e vërteta”.
Homazhet kanë filluar për Abu Akleh ndërsa u përhapën lajmet për vdekjen e saj.
Kolegu i Abu Alkeh, Nida Ibrahim, tha se ajo ishte një “gazetare shumë e respektuar” e cila kishte punuar me Al Jazeera që nga fillimi i Intifadës së dytë palestineze në vitin 2000, sipas rrjetit.
“Siç mund ta imagjinoni, kjo është një tronditje për gazetarët që kanë punuar me të,” tha Ibrahimi i përlotur.
Abu Akleh lindi dhe u rrit në Jerusalem dhe i përkiste një familjeje të krishterë, sipas Universitetit Bir Zeit, ku ajo ishte mësuese. Ajo ishte 51 vjeç, sipas universitetit.
“Ajo fillimisht studioi arkitekturë në Universitetin e Shkencës dhe Teknologjisë në Jordani, më pas kaloi në specializimin e gazetarisë së shkruar dhe mori një diplomë bachelor nga Universiteti Yarmouk në Jordani,” sipas biografisë së saj universitare.
Ajo kishte punuar me UNRWA, Voice of Palestine Radio, Amman Satellite Channel, Miftah Foundation dhe Monte Carlo Radio përpara se të bashkohej me Al Jazeera.
Fraksion.com
