Manastirliu: Paketë e plotë mbështetjeje për fëmijët në përkujdesje të Republikës

Fëmijët e prindërve të rënë në krye të detyrës përfitojnë nga sot statusin “Fëmijë në Përkujdesje të Republikës”.

Në një aktivitet të zhvilluar me praninë e kryeministrit Edi Rama, fëmijë dhe familjarë të profesionistëve të rënë në krye të detyrës, ministrja e Shëndetësisë dhe Mbrojtjes Sociale, Ogerta Manastirliu tha se ky është një premtim i mbajtur për t’i patur në përkujdes fëmijët e heronjve që dhanë jetën, për mbrojtjen e jetës së tjetrit.

“Një vit më parë, Kryeministri Rama bëri një premtim. Qeveria do u qëndronte pranë, pa asnjë rezervë, fëmijëve dhe familjeve të heronjve të këtij vendi. Sot, ky premtim bëhet realitet. Eshtë dita kur në zbatim të Ligjit “Për Fëmijët në përkujdesje të Republikës”, akordojmë statuset për fëmijët e heronjve dhe dëshmorëve të Atdheut, si shenjë mirënjohjeje për sakrificën vetëmohuese të baballarëve tuaj të dashur, të djemve tuaj të shtrenjtë, që sot nuk janë më mes nesh”, tha Manastirliu.

Në cilësinë e drejtueses së Komisionit Qendror të dhënies së statusit “Fëmijë në përkujdesje të Republikës”, Manastirliu tha  se “11 fëmijëve të parë u jepet ky status i posaçëm, duke theksuar se me ligjin e “Fëmijëve në Përkujdesje të Republikës”, këta fëmijë përfitojnë një paketë të plotë mbështetje, derisa të dalin në jetë e të mund të bëhen të zotët e vetes”.

“Pas vlerësimit të kujdesshëm, 11 fëmijëve u jepet statusi “Fëmijë në Përkujdesje të Republikës”, dhe u akordohen përfitimet e statusit, nga trajtimi financiar me mbështetjen çdo muaj me pagën e prindit që ka humbur jetën, përgjatë gjithë viteve të fëmijërisë e deri në moshën 25 vjeç, nëse fëmija ndjek shkollën e lartë. Po kështu do të kenë mbështetje për arsimim, punësim, kujdes shëndetësor dhe mbrojtje sociale”, bëri me dije Manastirliu.

Paketa e mbështetjes për fëmijët në përkujdesje të Republikës parashikon:

100% të pagës së prindit për çdo fëmijë, kur në ngarkim të personit që ka humbur jetën, ka vetëm një fëmijë që gëzon statusin “Fëmijë në përkujdesje të Republikës”.

70% për çdo fëmijë, kur në ngarkim të personit, që ka humbur jetën, ka dy fëmijë të mitur.

50% për çdo fëmijë, kur në ngarkim të personit, që ka humbur jetën, ka tre fëmijë.

40% për çdo fëmijë, kur në ngarkim të personit, që ka humbur jetën, ka katër fëmijë.

30 % qind për çdo fëmijë, kur në ngarkim të personit, që ka humbur jetën, ka më shumë se katër fëmijë që gëzojnë statusin “Fëmijë në përkujdesje të Republikës”.

“Fëmijët në Përkujdesje të Republikës” do të përfitojnë gjithashtu bursën për ndjekjen e arsimit parauniversitar në institucionet arsimore publike dhe tekste shkollore falas. Po kështu përfitojnë bursë të plotë nga fondi i mbështetjes studentore dhe janë të përjashtuar nga tarifa vjetore në institucionet publike të arsimit të lartë.

Gëzojnë të drejtën e orientimit profesional falas dhe mbështetje për punësim në administratën publike ose biznesin privat. Komisioni Qendror i ngritur për vlerësimin e dosjeve të profesionistëve të rënë në krye të detyrës, do të mblidhet çdo herë që ka kërkesa për marrjen e këtij statusi.

Fraksion.com