“Dhuratë bujare e Princit të Kurorës”; Rama: Lagjja në Spitallë, një nga më të bukurat e Programit të Rindërtimit

Në kantierin e madh të Rindërtimit, në Spitallë, Durrës puna vijon pa ndërprerje për ndërtimin e banesave të reja për qytetarët që mbetën pa shtëpi pas tërmetit të nëntorit 2019.

Lagjja e re që po ndërtohet është financim i Princit të Kurorës së Emirateve, Mohammed bin Zayed Al Nahyan së bashku me qeverinë shqiptare që financon përmes Fondit Shqiptar të Zhvillimit krejt infrastrukturën e lagjes së re.

Kryeministri Edi Rama ka publikuar foto nga kantieri në Spitallë, një qytezë e vërtetë, ku në përfundim të punimeve do të ketë rreth 1000 apartamente për 4000 banorë.

“MIRËMËNGJES, dhe me lagjen e re në Spitallë, Durrës, një nga më të bukurat dhe më të mëdhatë e Programit të Rindërtimit, dhuratë bujare e Princit të Kurorës së Emirateve të Bashkuara Arabe, mikut të shtrenjtë Muhammed Bin Zayed, për familjet që humbën shtëpitë nga tërmeti, ju uroj një ditë të mbarë”, shprehet Rama.

Fraksion.com