“Kjo është situata…”; Rama: Plan kursimi për energjinë dhe naftën, e hëna ditë pushimi në administratë

Qeveria vendosi që dita e hënë, 21 mars, të bëhet pushim për punonjësit e administratës, në kuadër të planit të kursimit të naftës dhe energjisë.

Lajmin e bëri të ditur sot kryeministri Edi Rama, në një takim me përfaqësues të shoqatave të transportit, ku u ndal te rritja e çmimit të naftës dhe energjisë dhe problemi i mungesës në treg.

Kryeministri solli në vëmendje se Agjencia Ndërkombëtare e Energjisë ka nxjerrë një plan me 10 pika për kursimin e energjisë dhe të naftës.

“Dy prej këtyre pikave ne i kemi diskutuar dhe i kemi në draft planin tonë të kursimeve të energjisë dhe naftës. Agjencia përmendte një gjë që ne e kemi diskutuar dhe do ta bëjmë. Ne kemi vendosur në mbledhjen e qeverisë që dita e hënë të jetë pushim dhe do të bëjmë një tjetër mbledhje qeverie që ta bëjmë ditën e hënë pa makina, për të kursyer, jo për ekologji. Agjencia Ndërkombëtare e Energjisë ka caktuar ditën e diel pa makina. Po ashtu plani ka edhe 3 ditë mosvajtje në punë si në kohën e pandemisë për shkak kursimi. Kjo është situata”, shtoi Rama.