Takimet Ukrainë-Rusi vazhdojnë në formatin online
Këshilltari i Presidencës ukrainase, Mykhailo Podolyak, bëri të ditur të shtunën se bisedimet me delegacionin e Federatës Ruse po vazhdojnë përmes video-lidhjes.
“Janë krijuar nëngrupe të posaçme të punës. Qëndrimet e Ukrainës janë të përcaktuara nga direktivat e mëparshme”, shkroi ai në Twitter.
Negotiations with the RF delegation are now ongoing in a continuous video format. Special working subgroups have been created. Ukraine's positions are determined by the previous directives. @AndriyYermak pic.twitter.com/FugNqjUxGV
— Михайло Подоляк (@Podolyak_M) March 12, 2022
Edhe pse disa herë janë hapur korridore humanitare, Kievi ka akuzuar Moskën se ka shkelur marrëveshjet e armëpushimit dhe ka sulmuar caqe civile.
Të shtunën, autoritetet e mbrojtjes së Ukrainës raportuan për shtatë të vrarë gjatë evakuimeve nga një fshat në afërsi të Kievit. Ukraina tha se forcat ruse hapën zjarr teksa një konvoj me gra dhe fëmijë po tentonin të largoheshin.
Ukraina dhe Rusia po ashtu kanë zhvilluar një takim në Antali. Kryediplomatët e të dy shteteve u takuan gjatë kësaj jave në këtë qytet turk, por takimi përfundoi pa rezultate konkrete.
Rusia ka nisur më 24 shkurt një sulm të paprovokuar ndaj Ukrainës. Bota perëndimore i është përgjigjur me sanksione të ashpra ndaj Moskës dhe Shtetet e Bashkuara janë zotuar se presidenti rus, Vladimir Putin, do të mbahet përgjegjës për agresionin ndaj Ukrainës./REL
Fraksion.com
