Gjeorgjia do të aplikojë zyrtarisht për anëtarësim në BE

Gjeorgjia do të aplikojë zyrtarisht për anëtarësim në Bashkimin Evropian (BE) të enjten, thanë sot zyrtarët e vendit.

Njoftimi u bë në Twitter nga Shalva Papuashvili, kreu i Parlamentit të Gjeorgjisë, dhe Nikoloz Samkharadze, kryetar i Komisionit të Parlamentit për Marrëdhëniet me Jashtë.

Postimet e tyre u ripostuan gjithashtu në llogarinë zyrtare në Twitter të partisë në pushtet “Ëndrra Gjeorgjiane”.

Përpjekja e Gjeorgjisë për t’u bashkuar me bllokun evropian vjen gjatë përpjekjes së Ukrainës për të përshpejtuar aplikimin e saj për anëtarësim.

Në vazhdën e luftës së Rusisë ndaj Ukrainës, presidenti Volodymyr Zelenskyy nënshkroi një kërkesë zyrtare për t’u bashkuar me BE-në këtë javë dhe përsëriti apelin e tij drejtuar BE-së në një video-fjalim drejtuar kombit sot në mëngjes.

Presidentët e tetë vendeve anëtare të BE-së – Bullgaria, Republika Çeke, Estonia, Letonia, Lituania, Polonia, Sllovakia dhe Sllovenia – kanë publikuar së fundmi një letër të hapur duke e inkurajuar bllokun t’i japë Ukrainës statusin e vendit kandidat për në BE.

Fraksion.com