Agalliu: Qeveria rrit indirekt çmimet e energjisë për qytetarët

Sekretari i grupit parlamentar të PD, Arbi Agalliu deklaroi sot se me rritjen e çmimit të energjisë për bizneset e mëdha, qeveria rrit indirekt çmimet për qytetarët.

Ai shprehet se, janë 7358 biznese të tensionit 20, 10 dhe 6 kW, të cilat duke filluar nga 1 Janar 2020 nuk do të furnizohen më me energji elektrike me çmim të paravendosur nga Enti Rregullator i Energjisë. Kjo është çka Konfindustria bën me dije.

“Sipas të gjitha parashikimeve, duke filluar nga muaji Janar, çmimi i energjisë pritet të rritet me mbi 200%. Rritja e tarifave të energjisë do të ndikojë në mënyrë të drejtë në rritjen e çmimeve të produkteve fundore. Kjo përkthehet në rritje të nivelit të përgjithshëm të çmimeve, çka e bën konsumatorin shqiptar të paaftë për të përballuar jetesën edhe në kushte minimale. Ulja e fuqisë blerëse dhe rritja e kostove të bizneseve do të bëjë që ekonomia jonë e brishtë të pësojë një tjetër goditje. Qeveria duhet në mënyrë imediate të mbrojë biznesin dhe prodhimin vendas, duke i mbështetur dhe jo duke i lënë të vetëm në përballjen me kriza ndërkombëtare. Por në vend që paratë të shkojnë në ndihmë të bizneseve të ndershme, vidhen me skemat korruptive të inceneratorëve”, shprehet ai.

Fraksion.com