Shqipëri-Kosovë, me abetare të përbashkët

Në Kosovë, ministrja e Arsimit dhe Sportit të Shqipërisë, Evis Kushi dhe ministrja e Arsimit dhe Shkencës së Kosovës, Arbërie Nagavci nënshkruan marrëveshjen për Abetaren e përbashkët.

“Nuk kanë kaluar as 3 javë nga mbledhja e përbashkët në Elbasan dhe në një kohë rekord arritëm te nënshkrimi i marrëveshjes 2 palëshe për Abetaren e përbashkët”, tha ministrja Kushi.

Ministrja u ndal edhe në projekte të tjera të përbashkëta, si marrëveshja për lehtësimin e procedurave dhe shkurtimin e afateve për njohjen e diplomave dhe gradave shkencore të të rinjve apo studiuesve të të dy vendeve.

Kushi më tej solli në vëmendje se, në nëntor u promovua një punë disa mujore për librin e gjuhës shqipe dhe kulturës shqiptare për diasporën.

Ndërsa ministrja e Kosovës, Nagavci tha se Abetarja e re e përbashkët do të jetë dhuratë për të gjithë nxënësit e klasës së parë në 110-vjetorin e Pavarësisë.

“Jemi të lumtur që Abetarja do të jetë e njëjtë për të gjithë vogëlushët shqiptarë, pavarësisht ku ata jetojnë“, tha ministrja Nagavci.

Ajo vuri në dukje se të dy ministritë janë të angazhuara që të ketë aktivitete konkrete të përbashkëta të edukimit, arsimit dhe kulturës.

Fraksion.com