“Abrija ka gjithë besimin tim”; Manja prezanton drejtorin e ri të Burgjeve

Ministri i Drejtësisë, Ulsi Manja prezantoi sot Drejtorin e Përgjithshëm të Burgjeve, Admir Abrija, i cili zëvendëson në këtë detyrë Agim Ismaili.

Në fjalën e tij prezantuese përpara gjithë stafit menaxhues të Drejtorisë së Përgjithshme të Burgjeve, Manja bëri një ekspoze të shkurtër të punës dhe arritjeve të ish-drejtorit Ismaili, duke vlerësuar angazhimin e tij prej marrjes së kësaj detyre.

“Falenderoj Agimin për punën e bërë. Eksperienca e tij është e çmuar dhe do të donim që ai të mos i shkëpuste urat e komunikimit me Ministrinë e Drejtësisë, edhe pas çdo detyre që do t’i caktohet”, tha Manja.

Ndërkohë, ministri përmendi karrierën e Abrijas duke e cilësuar atë mjaft pozitive, si dhe mundësinë që i jepet Drejtorit të ri të Burgjeve të punojë me një kuadër të ri ligjor në sistemin penitenciar.

“Në bisedën me Admirin, i kam parashtruar vizionin dhe objektivat e mia. Pres që ato të vihen në jetë nga dita në ditë”, u shpreh Manja.

Ai paralajmëroi filtrim të të gjithë burimeve menaxhuese, menjëherë pas mbylljes së këtij viti.

“Drejtoria e Përgjithshme e Burgjeve, dhe e gjithë piramida e këtyre institucioneve, pavarësisht gjithë problematikës për të cilën unë jam në dijeni të plotë, duhet të jetë model në zbatimin e ligjit dhe të drejtave të njeriut. Nuk dua të kemi ngjashmëri as hipotetike me imazhe që herë pas here vijnë nga institucione të tilla nga vendet fqinje”, tha Manja.

Fraksion.com