Kapet ish-agjenti i SHISH pas 7 vitesh në kërkim; Vrau pronarin e një gomisterie në 2014 pas sherrit për gomën
Pas 7 vitesh në kërkim për vrasje, Policia ka bërë të mundur sot arrestimin e ish-agjentit të SHISH, Xhevahir Mzhika. 51-vjeçari Mzhika u kap në rrugën “Babë Rexha”, anës lumit, dhe në momentin e ndërhyrjes së Policisë ka tentuar të largohet, por është neutralizuar nga efektivët.
Mzhika ishte dënuar me 10 vite burg për vrasjen e Florian Selmanit, ngjarje e ndodhur më 16 gusht të 2014 te isha Fusha e Aviacionit. Shkak i ngjarjes së rëndë u bë sherri pas blerjes së një gome të përdorur nga Mzhika në servisin që administrohej nga viktima Florian Selmani.
Kjo gomë plasi në rrugë, duke bërë shkak i një aksidenti ku u lënduan lehtë disa anëtarë të familjes së ish-agjentit të SHISH. Kjo bëri që mes Mzhikës dhe Selmanit të lindin disa kontradikta, duke sjellë dhe përdorimin e armës nga ana e agjentit, i cili qëlloi me një plumb në kokë pronarin e gomisterisë duke e lënë të vdekur në vend.
Pas kësaj Xhevahir Mzhika u largua në drejtim të paditur, deri sa u arrestua ditën e sotme.
NJOFTIMI I POLICISË
Në vijim të punës për lokalizimin e vendndodhjes dhe kapjen e personave në kërkim, shërbimet e Komisariatit të Policisë Nr. 2 kanë bërë lokalizimin e vendndodhjes së një personi të shpallur në kërkim për vrasje me dashje dhe armëmbajtje pa leje.
Mbi bazën e informacioneve të siguruara në rrugë operative u organizua dhe u finalizua me sukses operacioni policor i koduar “Reagimi”, si rezultat i të cilit u bë kapja dhe ndalimi i shtetasit në kërkim Xhevahir Mzhika, 51 vjeç, banues në Tiranë.
Ky shtetas u kap në rrugën “Babë Rexha”, anës lumit, dhe në momentin e ndërhyrjes së Policisë ka tentuar të largohet, por është neutralizuar nga shërbimet e Policisë. Këtë shtetas, Gjykata e Shkallës së Parë Tiranë e ka dënuar me 10 vite burgim për veprat penale “Vrasja me dashje” dhe “Armëmbajtja pa leje”. 51-vjeçari është autori i ngjarjes së ndodhur më datë 16.08.2014, tek isha Fusha e Aviacionit, ku ka vrarë me armë zjarri shtetasin Florian Selmani.
Fraksion.com
