Danny Fenster: Gjykata e Mianmarit e dënon gazetarin amerikan me 11 vjet burg

Një gjykatë ushtarake në Mianmar ka dënuar gazetarin amerikan Danny Fenster me 11 vjet burg.

Fenster u shpall fajtor për shkelje të ligjit të imigracionit, shoqërim të paligjshëm dhe inkurajim të mospajtimit  me ushtrinë.

Në fillim të kësaj jave ndaj tij u ngritën dy akuza shtesë për kryengritje dhe terrorizëm, të cilat parashikojnë një dënim maksimal me burgim të përjetshëm.

Gjyqi i tij për akuzat e reja do të fillojë më 16 nëntor.

Fenster, 37 vjeç, i cili ishte redaktori menaxhues i faqes në internet Frontier Myanmar, u arrestua në aeroportin ndërkombëtar të Yangon në maj. Ai është një nga dhjetëra gazetarët vendas që janë arrestuar që nga grushti ushtarak i shtetit në shkurt.

Sipas Frontier, Fenster kishte punuar më parë për Myanmar Now, një faqe e pavarur lajmesh që ka qenë kritike ndaj ushtrisë që nga grushti i shtetit.

“Akuzat bazoheshin të gjitha në pretendimin se ai punonte për median e ndaluar “Myanmar Now”. Danny kishte dhënë dorëheqjen nga Myanmar Now në korrik 2020 dhe iu bashkua Frontier muajin tjetër, kështu që në kohën e arrestimit të tij në maj 2021 ai kishte punuar. me Frontier për më shumë se nëntë muaj”, tha faqja e lajmeve.

“Nuk ka absolutisht asnjë bazë për të dënuar Danny për këto akuza.”

Dënimi i tij të premten vjen disa muaj pasi një gazetar japonez i pavarur u arrestua në Myanmar dhe u akuzua për përhapjen e lajmeve të rreme.

Yuki Kitazumi, i cili raportonte për shumë prej mediave kryesore të lajmeve të Japonisë, ishte një nga pak reporterët e huaj në vend. Autoritetet e Mianmarit thonë se ai ka shkelur ligjin, por e ka liruar sepse Japonia e kishte kërkuar atë.

Shtetet e Bashkuara kanë bërë thirrje për lirimin e Fensterit.

Fraksion.com