Rama: “Ballkani i hapur” e ardhmja, Shqipëria nuk ka kohë për të humbur

Kryeministri Edi Rama deklaroi sot në mbrëmje se “”Ballkani i hapur” është e ardhmja dhe se Shqipëria nuk ka kohë për të humbur por duhet të vazhdojë në shtjellimin e kësaj ideje”.

Kryeministri Rama mori pjesë sot në përvjetorin e Fondacionit gjerman “Friedrich Ebert” në Shqipëri, të cilin e vlerësoi si “një partner i nderuar i Partisë Socialiste të Shqipërisë dhe zë i respektuar i familjes së socialistëve evropianë, me kontribut të çmuar në vendin tonë”.

Ndërsa vlerësoi kontributin në Shqipëri të Fondacionit “Friedrich Ebert”, Rama tha se në “këtë rrugëtim 30-vjeçar, fondacioni ka qenë i pranishëm duke na shoqëruar me dije”.

“Ajo që vlen gjithmonë të kujtohet edhe si mësim nga shembulli i madh i Gjermanisë është se cilësia e demokracisë si cilësi bashkëjetese mes të ndryshmëve nuk varet nga sa shpesh biem dakord, por nga mënyra se si nuk biem dakord. Në këtë aspekt kemi shumë rrugë për të bërë ende, sepse do të na duhet një kohë jo e shkurtër për të arritur në pikën ku  kundërshtarët politikë t’i trajtojmë si rivalë dhe jo si armiq”, tha Rama.

Lidhur me “Ballkanin e hapur”, Rama shprehu bindjen se “është ideja e duhur, në kohën e duhur”.

“Pa diskutim që të gjithë do ta përqafojnë këtë ide hap pas hapi. Por, Shqipëria nuk ka kohë për të humbur dhe duhet të vazhdojë në shtjellimin e kësaj ideje. Kjo është e ardhmja, të ndërtojmë një hapësirë në rajon që të jemi një shembëlltyrë e asaj që do të jemi në BE. Dhe kështu fitojmë kohë nga ardhmja, se ‘Ballkanin e Hapur’ do të jemi të detyruar ta bëjmë dhe nuk do të kemi asnjë rrugë tjetër kur të hyjmë në BE. Duke e bërë sot me bindje dhe efikasitet ne jo vetëm që ndërtojmë një hapësirë funksionale të 4 lirive të BE-së, por i japim vendit mundësi të rrisim ekonominë tonë”, tha Rama.

Kryeministri theksoi se “asnjë nga vendet tona nuk e ka luksin të lërë ekonominë mënjanë dhe të merret me politikën në plan të parë për interesa partiake të brendshme”.

Kryeministri u ndal në ecurinë e procesit të integrimit evropian në Shqipëri dhe çështjes së fillimit formal të negociatave të anëtarësimit në BE.

Rama tha se “për ne kjo ka qenë një periudhë maturimi dhe kuptimi më i drejtë dhe më i plotë i këtij procesi dhe i vetë natyrës kontradiktore dhe gjithmonë e më shpesh të paparashikueshme në proces”.

“Me këtë shpërthimin e papritur të problemit të Bullgarisë, ne duhet të mos e humbim fokusin në asnjë moment nga fakti themelor se jemi në këtë proces jo se na e kanë imponuar të tjerët, por sepse e ka zgjedhur populli vetë lirisht 30 vjet më parë. Ne duhet të vazhdojmë të bëjmë edhe më shumë se sa kemi bërë, pavarësisht se çfarë vendimesh merren në Bruksel dhe se çfarë kushtesh shtohen në Bundestag apo kudoqoftë tjetër. Zgjedhja, qëllimi dhe detyrimi ynë ndaj gjeneratave të tjera është ta bëjmë Shqipërinë një hapësirë demokracie funksionale si në BE”, tha Rama.

Rama tha se procesi nuk varet nga ne, por se çfarë vendoset nga familja e bashkuar evropiane mes 27 vendeve, vendimmarrje që asnjëherë nuk mund të parashikohet deri në fund.

“Kujt i shkonte mendja te Bullgaria? Ne kishim fokusin te zgjedhjet në Holandë shkon dhe del Bullgaria nga ana tjetër. Askush nuk e parashikon 100 % se nuk del një tjetër. Deri para 2 vitesh kur diskutimi ishte i shtruar në tavolinë Bullgaria ishte 100 % dakord. Ndaj duhet të fokusohemi me të gjitha forcat te vetja, te puna jonë, dhe të bëjmë gjithçka për të përfituar nga kjo dije që BE dhe KE na afron. Procesi i integrimit është një proces transferimi dijesh dhe metodologjie për të bërë reformat e duhura”, tha Rama.

Në përfundim, Rama shprehu mirënjohjen për çfarë fondacioni “Friedrich Ebert” ka bërë me PS-në në disa stacione dhe çfarë ndihme të rëndësishme ka dhënë në pasurinë më të rëndësishme të çdo vendi që është dija.

“Sot ne kemi pasur edhe një pjesë të rëndësishme bisede për idenë e Akademisë sonë Politike. Fondacioni “Friedrich Ebert” do të jetë përsëri me ne në këtë nismë të re. Për sa kohë shoqëritë nuk investohen tek edukimi politik i më të rinjve, jo edukimi partiak pasi atë e bëjnë partitë secila më vete, por edukimin me idenë e thjesht bazike që pa përmirësuar cilësinë e politikës përmes edukimit dhe kalimit te të rinjtë, do e kemi jashtëzakonisht të vështirë dekadë pas dekade. Akademia jonë Politike është një pikë uji në oqean, por ne duam ta bëjmë këtë përpjekje dhe të bashkojmë forcat me fondacionin për të ndihmuar të rinjtë që të kuptojnë se politika është një instrument që ju vlen atyre për të luftuar për kauzat e tyre”, tha Rama.