Tiranë: Dhoma Amerikane dhe Ambasada Amerikane bëjnë thirrje për transparencë dhe konkurrencë të ndershme në ekonomi

Presidenti i Dhomës Amerikane të Tregtisë, Enio Jaço, tha sot se në qarqet e biznesit ekziston një shqetësim në rritje dhe pakënaqësi me politikat e brendshme të vendit.

“Indeksi Vjetor i Biznesit tregon se shumë shpesh praktikat në mënyrën e të bërit biznes nuk janë të drejta, dhe talente të reja profesionale janë duke parë mundësitë e largimit nga Shqipëria” – tha zoti Jaço.

Ai i bëri këto komente në Asamblenë e 21-të e Dhomës Amerikane të Tregtisë, ku krahas shumë anëtarëve, morën pjesë ambasadorja e SHBA-ve, Yuri Kim, dhe ministrja e financave dhe ekonomisë, Delina Ibrahimaj.

“Shqipëria ka sot ekonominë e bardhë e të pastër, ekonominë gri dhe atë të zezë (informale). Ju që punoni në ekonominë e bardhë, jeni duke paguar kostot e anës së errët të ekonomisë, ekonomisë së zezë dhe asaj gri. Kjo nuk është e drejtë dhe duhet të marrë fund!” – iu drejtua zoti Jaço përfaqësuesve të kompanive.

Ai mirëpriti anëtaren më të re të Dhomës Amerikane, Korporatën Bechtel, e cila të zbatojë një nga projektet më të rëndësishme të energjisë në Skavicë, me një ndikim të jashtëzakonshëm në ekonomi dhe turizëm. Zoti Jaço shtoi se përveç Bechtel, dy gjigantë të tjerë amerikanë: Excon Mobile dhe Accelerate janë në fazën paraprake të eksplorimit të një projekti tjetër të rëndësishëm energjetik, ku do të krijojnë vende të reja pune

“Ka ardhur koha që të ndalim së diskutuari problemet e Klimës së Biznesit dhe të nisim ndërhyrjet konkrete ligjore për përmirësimin e saj, duke ofruar mundësi dhe zhvillim për të gjithë” – theksoi zoti Jaço.

Në Asamblenë e AMCHAM-it, ambasadorja e SHBA-ve, Yuri Kim, theksoi se përparësitë amerikane në Shqipëri janë demokracia, mbrojtja dhe biznesi.

“Ne i bëjmë thirrje qeverisë shqiptare t’i japë përparësi përmirësimit të klimës së biznesit për të zhbllokuar me të vërtetë potencialin që ekziston këtu. Reforma në drejtësi duhet çuar deri në fund në mënyrë që gjykatat të jenë pastra, të drejtat e pronës duhet të trajtohen një herë e mirë, sa më shpejt të jetë e mundur, dhe konkurenca e ndershme duhet të jetë parësore në mënyrë që të gjithë investitorët, të mëdhenj apo të vegjël, shqiptarë apo të huaj, të luajnë me të njëjtat rregulla të drejta dhe transparente”” – tha ambasadorja Kim.

Ajo kujtoi se afro një vit më parë u nënshkrua një Memorandum i Bashkëpunimit Ekonomik dypalësh, duke shprehur angazhimin e SHBA për një marrëdhënie edhe më të fortë ekonomike me Shqipërinë.

“Dy javë më parë, vizitova projektin e hidrocentralit të Skavicës me Bechtel. Projekti në Vlorë me Excelerate Energy dhe ExxonMobil është një shembull tjetër i fortë dhe, nëse ka sukses, do të jetë investimi i huaj i drejtpërdrejtë më i madh në Shqipëri kryer ndonjëherë nga një kompani amerikane” – theksoi ambasadorja Kim.

Krahas këtyre projekteve të mëdha ajo veçoi rritjen e eksport – importeve, të cilat deri në fund të gushtit tejkaluan të gjithë vitin 2020, si dhe shtimin e markave amerikane në tregun shqiptar.

Më herët ambasadorja e SHBA-ve në Shqipëri, Yuri Kim, shkroi në Twiter pas një takimi me zëvendës-kryeministrin Arben Ahmetaj, se theksoi në bisedën me të dëshirën e SHBA-ve për bashkëpunim të fortë në demokraci, mbrojtje & biznes.

“Nënvizova gjithashtu se SHBA janë jashtëzakonisht shumë serioze mbi korrupsionin si pjesë e interesit tonë kombëtar. Ne nxisim qeverinë që të marrë marrë masa të vërteta, në mënyrë që Shqipëria të jetë më e drejtë, më e fortë dhe më e pasur” – theksoi ambasadorja Kim.

Ambasadorja amerikane nënvizoi nga ajo bisedë rëndësinë e zgjidhjes së të drejtave të pronës, përfshirë përmes dixhitalizimit të arkivave për të ndalur ndërhyrjen ilegale njerëzore”.

“Biseduam mbi rëndësinë e reformës në drejtësi në mënyrë që qytetarët & investuesit të mbështeten në gjykata të pastra; adresimin e pastrimit të parave dhe shqetësimeve të tjera të ngritura nga Task Forca për Veprim Financiar” – shënoi ambasadorja Kim.

Ajo u shpreh se 30 vjet nga përfundimi i diktaturës komuniste, udhëheqësit e Shqipërisë nga të gjitha krahët duhet të shfrytëzojnë mundësinë për t’i ndalur zakonet e këqija të së kaluarës, për të bërë ndryshime të vështira por të nevojshme në mënyrë që brezi i ardhshëm të ketë një të ardhme më të mirë. “Nëse jo tani, kur? SHBA do të vazhdojnë të jenë me ju në mbështetje të plotë” – theksoi ambasadorja amerikane Kim.

 

Fraksion.com