“Historia nuk fillon e as mbaron”; Ministri Çuçi prezanton Gledis Nanon si drejtor i Përgjithshëm i Policisë

7 Tetor, 2021 admin

Ministri i Brendshëm, Bledi Çuçi prezantoi sot drejtorin e ri të Përgjithshëm të Policisë së Shtetit, Gledis Nano.

Në ceremoninë e zhvilluar në ambientet e Drejtorisë së Përgjithshme të Policisë, Çuçi u shpreh se, “sot është një ditë e veçantë nga ato që ndoshta janë si gur kilometrik për punën e një prej organizatave më të vjetra të shteteve”.

“Historia nuk fillon me një drejtor dhe mbaron me një drejtor, por unë me bindje të plotë them që drejtor Ardi Veliu gjatë 4 viteve të mandatit të tij pa diskutim që e ka çuar Policinë e Shtetit në nivelet më të mira që ajo ka pasur në 30 vitet e tranzicionit”, theksoi Çuçi.

“Këtu ndajmë të njëjtin mendim të gjithë bashkë. Gjithkush mund të ketë rezerva, por përpara fakteve kokëforte të gjithë duhet të pranojmë që Policia e Shtetit është një organizatë me dinjitet dhe tërësisht e barabartë me partnerët tonë perëndimorë. Policia e Shtetit ka sot besueshmërinë më të lartë që ka pasur në 30 vitet e pas tranzicionit”, u shpreh Çuçi.

Çuçi tha se, “e gjetëm Policinë e Shtetit me 35% nivelin e besueshmërisë dhe sot që Ardi lë stafetën e kemi në 65%”.

Çuçi shtoi se, “në cdo sektorë në çdo statistikë Policia e Shtetit sot është superiore ndaj vetes së vet që ka qenë përpara disa vitesh. Padyshim një nga kontribuuesit e këtyre rezultateve është edhe drejtor Ardi Veliu”.

“Sot kalojmë stafetën dhe fillojmë një rrugëtim të ri me një oficer të ri të karrierës gjithashtu. Gledis Nano do e ketë shumë të vështirë sfidën edhe për shkak të niveleve ku ka arritur performanca e Policisë së Shtetit”, theksoi Çuçi.

“Përveç konsideratave të larta që kemi për Gledisin si oficer edhe si shërbyes me profesionalizëm të lartë deri më sot në Policinë e Shtetit, fjalët e tjera do t’ia lëmë kohës dhe punës që vetë Gledisi do demostrojë gjatë ushtrimit të detyrës”, nënvizoi Çuçi.

“Asnjë drejtor policie, asnjë ministër i Brendshëm nuk mund të ketë sukses pa angazhimin e të gjithëve ju që jeni sot dhe të gjithë atyre punonjësve të Policisë që shërbejnë në çdo cep të Shqipërisë”, përfundoi ministri Çuçi.

Nano: Do të vijoj më tej në çuarjen përpara të reformave në Policinë e Shtetit

Drejtori i Përgjithshëm i Policisë, Gledis Nano u shpreh në fjalën e tij gjatë ceremonisë së marrjes së detyrës, se besimi i detyrës së Drejtorit të Përgjithshëm të Policisë së Shtetit, përtej privilegjit, e ngarkon me përgjegjësinë për të qenë në lartësinë e detyrës në shërbim të qytetarëve dhe në nderim me përulje ndaj mundit, sakrificës dhe gjakut të derdhur nga çdo dëshmor i përjetësuar në yll në memorialin e kujtesës së Policisë së Shtetit.

“Ndaj gjej rastin, së pari t’u shpreh një falënderim të posaçëm, Ministrit të Brendshëm dhe Kryeministrit të Shqipërisë, për besimin e dhënë në këtë detyrë të re, si Drejtor i Përgjithshëm i Policisë së Shtetit”, theksoi ai.

“Profesioni im nuk ishte zgjedhje karriere, por pasion i frymëzuar nga babai im, ish-oficer policie. Në këto dy dekada në radhët e Policisë së Shtetit, nga pozicioni më i ulët e deri në detyra të larta, kam kuptuar se ky institucion është një pjesë kryesore e jetës sime, që kërkon angazhim dhe përkushtim të lartë në çdo detyrë”, tha Nano.

Sfidat për policinë, theksoi ai, janë të shumëfishta, pasi “puna dhe rezultatet pozitive të arritura nga paraardhësi im Ardi Veliu kanë nevojë të çohen përpara”.

“Qytetarët presin nga Policia e Shtetit standarde të tjera reagimi dhe sjelljeje në zgjidhjen e problemeve të tyre. Dhe ne do të bëjmë maksimumin për t’ia arritur. Por në të njëjtën kohë, kërkoj prej tyre ta konsiderojnë Organizatën tonë si një partner. Roli i tyre është i pazëvendësueshëm në suksesin e punës tonë. Ndaj, do të jem gjithnjë inkurajues që bashkëpunimi qytetar-polici, sa të vijë e të forcohet edhe më shumë. Gjithashtu, prioriteti im do të jetë intensifikimi i bashkëpunimit me të gjitha agjencitë ligjzbatuese në vend, partnerët ndërkombëtarë dhe misionet që asistojnë Policinë shqiptare”, vijoi Nano.

“Ne synojmë një polici më të trajnuar, me kapacitete të shtuara në fushën e dixhitalizimit, mirëmenaxhim të çdo burimi njerëzor bazuar në meritokraci, të cilat janë parakushtet për një hap cilësor, çka do ta rendiste shpejt Policinë shqiptare, cilësisht, krah policive evropiane”, tha ai.

“Unë ju garantoj se me angazhimin tim maksimal do të vijoj më tej në çuarjen përpara të reformave në Policinë e Shtetit, duke synuar rritjen e aftësive profesionale dhe operacionale, në përmbushje të misionit kushtetues që ajo ka”, u shpreh ai më tej.

“Nuk dua të ndalem më gjatë në këtë fjalë përshëndetëse, por në ditën e parë të detyrës time si Drejtor i Përgjithshëm i Policisë së Shtetit, dua të shfrytëzoj rastin e t’i uroj çdo kolegu suksese në përmbushjen e angazhimeve që burojnë nga respektimi i ligjit.

Të gjithë ne jemi betuar përpara flamurit ditën që kemi marrë detyrën, ndaj kërkoj angazhimin tuaj maksimal në realizimin e detyrave funksionale, sipas betimit, që të gjithë ne kemi bërë!”, përfundoi Nano.

Veliu: Policia e Shtetit sot është shumë herë më e mirë se dje

Ish-drejtori i Përgjithshëm i Policisë së Shtetit, Ardi Veliu në fjalën e tij gjatë ceremonisë, u shpreh se, “në 35 vitet e mia nën uniformë, duke filluar nga 14 vjeç, jam brumosur dhe edukuar që t’i shërbej vendit tim dhe qytetarëve të vendit tim. Çdo ditë të karrierës time, çdo ditë të detyrës tim jam mbështetur në 3 shtyllat kryesore, të cilat kanë qenë çdo ditë në vlerësimin tim si ndershmëria, përkushtimi dhe humanizmi”.

“Sot, Policia e Shtetit është më mirë se dje dhe falë kësaj pune të cilën, së bashku përballuam sfidat e tërmetit të vitit 2019, kur që në momentet e para deri sa u përfundua dita e fundit, ishit të parët të cilët dhatë ndihmën e parë, shpëtuat jetën e qytetarëve dhe kryem këtë mision më së miri”, u shpreh Veliu.

“Prandaj kam një vlerësim dhe një mirënjohje për të gjithë juve, për faktin sepse së bashku arritëm që të menaxhonim qindra tubime, të cilat në momente të caktuara u shoqëruan edhe me lëndime të jo pak, por 67 punonjësve të Policisë”, tha Veliu duke shtuar se, “për muaj dhe vite me radhë arritëm që të menaxhonim të gjithë situatën e pandemisë”.

“Policia e Shtetit sot është shumë herë më e mirë se dje, pavarësisht se të verbuarit nga 20-fishimi i çmimit të kanabisit në vendin tonë, apo të shurdhuar nga 1 ton kokainë e bllokuar nga Policia, nga ju të nderuar kolegë, kërkojnë të hedhin baltë mbi policinë, mbi punën. Mbi punën, djersën e 12 mijë punonjësve të policisë. Por policia nuk fillon as me mua dhe nuk mbaron as me mua”, u shpreh Ardi Veliu.

Fraksion.com

You May Also Like