Përdorej për trafik kanabisi? Rrëzohet avioni në Vermosh, arratisen piloti dhe pasagjeri: Erdhi një makinë dhe i mori
Një avion i dyshimtë, pa asnjë shenjë identifikimi është rrëzuar në Vermosh, e ndërsa ngjarja është mbuluar me mister. Mësohet se avioni u ul rreth orës 09:00, tentoi të ngrihej pas 30 minutash, por u përplas me pishat dhe u ul sërish. Referuar dëshmisë ekskluzive të kryeplakut të fshatit që ka bërë për Report Tv, Prek Vata ai ka thënë se 2 personat që ishin në bord janë marrë nga një makinë ngjyrë të bardhë, gjurmët e së cilët janë ende në livadh. Ai thotë barinjtë e kanë parë këtë skenë dhe kanë shkuar për t’i ndihmuar, por nuk janë lejuar.
Ai ka deklaruar se avioni është ulur fillimisht, por më pas ka tentuar që të ngjitet, por nuk ia ka dalë. Dy pasagjerët në avion, ka deklaruar ai ka ardhur një makinë dhe i ka marrë.
“Është ulur avioni, ka tentuar që të ngrihet sërish. Si pas asaj që kanë parë barinjtë, duket se ka pësuar defekt, ka rënë në një gardh dhe trung pishe, ka ardhur një makinë dhe i ka marrë ato dy personat, ka dhe shenjat e policisë. Policia është në dijeni, nuk ka shtëpia afër këtu, barinj që kanë tokën këtu. Nuk i kanë lënë barinjtë që t’u afrohen. Ka pasur kultivim të kanabisit në këtë zonë”, tha ai.
E gjithë kjo ngjarje ngre dyshime se mund të bëhet fjalë për trafik të drogës, nisur edhe nga fakti se kryeplaku thotë se në këtë zonë ka pasur parcela me kanabis si edhe operacione nga policia për shkatërrimin e tyre. Kush është piloti dhe pasagjeri, në çfarë ore ka mbërritur avioni? Cila ka qenë pesha e tij në fluturim? Sa karburant ka patur në sabrator? Funksiononin apo jo pajisjet e transmetimit GPS, si dhe shpejtësia e fluturimit, këto janë disa pyetje që nuk kanë marrë ende një përgjigje. Siç shihet në foto që Report TV, brenda në avion ka pasur disa bimë, por nuk dihet se çfarë lloji janë. Gjithashtu një detaj është se mund të ketë pasur edhe një modifikim të vendit të pasagjerit, për të hapur më shumë hapësirë. Qëllimi? Nuk dihet ende.
Kjo skenë rikthen në vëmendje rastet e avionëve të rënë në Durrës dhe Lushnje, ku u zbulua se po përdoreshin për trafik kanabisi. Bëhet fjalë për ngjarjen e ndodhur në vitin 2014, kur një avion i tipit “Piper” i drejtuar nga piloti italian, Giorgio Riformato u ul në plazhin e Divjakës, në Lushnje, për të marrë një sasi prej rreth 300 kg kanabis sativa, apo pilotin italian Guido Guidi, i cili pranoi se do të transportonte 200 kg kanabis, por në momentin e gjetjes së avionit në Ishëm në bordin e avionit nuk u gjet drogë.
Fraksion.com
