Vuçiqi kërkon tërheqjen e të gjitha trupave nga veriu i Kosovës
Në Beograd është mbajtur seanca urgjente e Këshillit të Sigurisë, për shkak të gjendjes së tensionuar në veri të Kosovës. Presidenti Vuöiq prezantoi qëndrimet serbe.
Presidenti Vuçiq tha se atij i është dërguar së fundi një propozim për zgjidhjen e situatës së krijuar në pikat kufitare në Jarinje dhe Bërnjak. Por ai e ka refuzuar këtë propozim duke e quajtur ate “poshtërues për Serbinë”.
Vuçiq së pari foli për gjendjen në Ushtrinë e Serbisë dhe në Ministrinë e Brendshme të Serbisë, si dhe për armatimet që posedojnë ato. Ndërsa si “aksion kriminal” e quajti pozicionimin e forcave speciale policore të Kosovës në pikat kufitare në Jarinje e Bërnjak, për ta mbikqyrur zbatimin evendimit të fundit të qeverisë për reciprocitet në çështjen e targave të automjeteve.
“Aksioni kriminal”
Presidenti i Serbisë tha se në takimin e Këshillit të Sigurisë Kombëtare ata kanë “diskutuar situatën në Kosovë dhe veçanërisht aksinionin kriminal të Prishtinës, si dhe ndërhyrjen e gjashtë të këtyre forcave në veri të Kosovës dhe Metohisë, me përdorimin e automjeteve të blinduara, armëve të gjata dhe shqetësime të qytetarëve”.
“Zgjidhja e vetme është tërheqja e të gjithë trupave nga atje dhe kthimi në situatën e mëparshme”, tha presidenti serb. “Serbia do të këmbëngulë në ruajtjen e paqes dhe sigurisë së plotë për serbët në Kosovë e Metohi. Ne i konsiderojmë të papërshtatshme deklaratat ku barazohen Beogradi dhe Prishtina. Serbia dëshiron ta vazhdojë dialogun, por nuk dëshiron të pranojë marrëveshje nga veprimet kriminale”, theksoi presidenti i Serbisë Aleksandar Vuçiq.
Biseda me diplomatë të huaj
Vuçiq tha se në mëngjes ka biseduar me ambasadorët e vendeve më të fuqishme perëndimore dhe ambasadorët e Quintit, për një “zgjidhje kompromisi”. Por propozimet e këtyre ambasadorëve për zgjidhjen e situatës i ka quajtur “të papranueshme”.
“Unë i refuzova këto propozime, sepse ato nuk ajnë kompromis por një zgjidhje që do ta poshtëronte Serbinë. Është një zgjidhje me të cilën 70% e asaj që shqiptarët kishin ndërmend të bënin në vijën administrative do të harrohej, ndërsa do të prezantoheshin vetëm 20-30 përqind e masave. Për këtë refuzim kam marrë pëlqimin e Këshillit. Unë jam lodhur nga politika e akteve të kryera, kështu nuk mund të flisni më me Serbinë”, thëksoi Vuçiq. Ai tha se do të pres deri në tetor përgjigjen e Bashkimit Evropian për formimin e Asociacionit të komunave me shumicë serbe. Dhe më pas do të paraqes qëndrimet e Serbisë.
Në takimet e Këshillit të Sigurisë Kombëtare në Serbi bëjnë pjesë, përveç presidentit që e kryeson, edhe ministrat e Mbrojtjes dhe Policisë si dhe drejtuesit e ushtrisë dhe shërbimit sekret BIA./DW
Fraksion.com
