“Vaksina Moderna më efektive sesa Pfizer- BioNTech”; Ja çfarë tregon studimi në SHBA ndaj variantit Delta
Vaksina Moderna është më efektive sesa vaksina Pfizer- BioNTech ndaj variantit Delta të Covid-19. Këtë gjë e tregoi një studim i bërë së fundmi në Shtetet e Bashkuara të Amerikës lidhur me variantin Delta të COVID-19, i cili rezulton më i transmetueshëm.
Të dyja vaksinat ishin shumë efektive ndaj versionit tradicional të Covid-19 me një efektivitet prej 90% pas marrjes së dy dozave. Studimi i kryer nga Mayo Clinic tregon se me hyrjen e variantit Delta, i cili u shfaq për herë të parë në Indi, efektiviteti i vaksinave u ul.
Kështu që sipas studimit vaksina Pfizer- BioNTech ra në një efektivitet prej 42% ndaj variantit Delta ndërsa Moderna është 76% efektive ndaj këtij varianti.
Studimi mori për kampion rreth 50 mijë pacientë. Nuk dihet saktësisht çfarë e ka shkaktuar këtë rënie të efektivitetit të vaksinave. Izraeli që ka vaksinuar shumicën e popullsisë me vaksinën Pfizer- BioNTech ka vendosur që personat mbi 60-vjeç të marrin një dozë të tretë. Edhe vende të tjera po marrin në konsideratë dhënien e një doze të tretë.
Shumë vende nga e gjithë bota po përballen me një valë të re infektimesh të shkaktuar nga varianti Delta. Së fundmi Koreja e Jugut, Gjermania, SHBA raportuan shifra të larta infektimesh. Varianti Delta është konfirmuar edhe në vendin tonë dhe prej disa ditësh ka një shtim të rasteve të reja.
Fraksion.com
