“Dëgjuam zhurmën e një droni”; Tentativa e arratisjes së Arbër Çekajt dhe Fatmir Pjetrit: 8 efektivë nën hetim për shpërdorim detyre
Shkon në 8 numri i efektivëve të Policisë së Burgjeve të vënë nën hetim nga Prokuroria nën dyshimin e shpërdorimit të detyrës për planin e arratisjes së Arbër Çekajt dhe Fatmir Pjetrit.
Sipas burimeve, disa të paraburgosur kanë deklaruar se një ditë para ngjarjes kanë dëgjuar zhurmën e një droni mbi burg.
Ky informacion është duke u verifikuar nga Prokuroria e Tiranës, e cila ende nuk ka një konkluzion, nëse këto deklarime qëndrojnë apo jo.
Prokuroria e Tiranës tha për Top Channel se ka dyshime se me veprimet dhe mosveprimet e tyre policët e burgut 313 Gëzim Ramushi, Sajmir Shahini, Bashkim Muça, Olti Myzyri, Redion Maloku dhe Edmon Prenga mund të kenë shpërdoruar detyrën.
Kjo vjen pasi nuk kanë ushtruar kontroll fizik tek Fatmir Pjetri i cili kishte me vete një çantë. Prokuroria e ka deklaruar këtë edhe para trupës gjykuese, duke theksuar se ka nisur hetimet edhe për ta.
Kujtojmë se Gjykata vendosi masën “Arrest me burg” një ditë më parë për të tre, veç izolimit dhe burgut që kanë mbi kurriz, ndërsa Arbër Çekaj, Fatmir Pjetri dolën para trupës gjykuese bashkë me bashkëpunëtorin e tyre Lulzim Çepele që u përfshi në arratisje sepse improvizoi vetëvrasje duke prerë damarët e dorës.
Pjetri ka pohuar para trupës se ai është fajtori për tentativën e arratisjes, ndërsa Çepele tha se tentoi të vriste veten sepse ishte në gjendje të rënduara psikologjike.
Çekaj dhe Pjetri tentuan të arratiseshin nga burgu duke përdorur litar të formuar nga çarçafët e shumtë, por dështuan. Madje kur u pikasën nga oficeri i burgjeve, i cili dha alarmin për tentativën e arratisjes, Pjetri e qëlloi me çengel.
Çekaj i dënuar me 14 vite burg dhe Pjetri i dënuar me 30 vite burg u ndaluan pak metra larg portës, pikërisht në oborrin mes zyrave të administratës dhe qelive, muret e të cilëve gati 11 vjet më parë u kapërcyen nga i riu Ajet Marku që sfidoi burgjet dhe jetoi në arrati për tre vitet e mëpasshme. Tentativa e dytë e dështuar falë kujdesit të një oficeri ka sjellë një analizë të detajuar në burgje, të cilat po vlerësojnë kushtet e sigurisë në 313, brenda të cilit gjendet edhe 41 bis.
Fraksion.com
