AktualitetTë fundit

Peleshi: Vatër e re e rrezikshme zjarri në Mashkullorë në Gjirokastër, thirrje për evakuim të banorëve

Ministri i Mbrojtjes, Niko Peleshi, duke folur sot nga Baza Operative e Pashalimanit mbi situatën e zjarreve tha se, një vatër e rrezikshme ka nisur në Mashkullorë të Gjirokastrës, teksa ka apeluar banorët për evakuim, pasi rrezikohet fshati.

“Të gjithë e kemi përcjellë këto ditë, natyrisht është një sezon shumë i vështirë për të gjithë shqiptarët që janë pranë vatrave të zjarrit, por veçanërisht për ata që përballen në frontin e parë”, tha Peleshi.

Peleshi falënderoi “të gjithë Forcat e Armatosura që kanë qenë në frontin e parë të betejës. Stafet e tjera të emergjencave civile, natyrisht të pushtetit vendor të Zonave të Mbrojtura gjithashtu, të pakët në numër, por shumë të vlefshëm në kontribut për shkak se janë ata që njohin shtigjet dhe kanë ndjeshmërinë e lartë, e cila na duhet dhe na ndihmon ne”.

Por, shtoi ai, “ka pasur një angazhim të jashtëzakonshëm të FA dhe dua t’i falënderoj posaçërisht. Kemi mundur falë këtij angazhimi shumë të madh të shuajmë 163 zjarre deri tani. Është një shifër shumë dinamike për shkak se, për shembull, para 10 minutash kemi një vatër të re shumë të rrezikshme në Mashkullorë në Gjirokastër. Sapo dërguam një mjetet ajror, një helikopter dhe 50 trupa që i kishim të dislokuar aty pranë në fshatrat e Gjirokastrës”.

Peleshi u shpreh se, “kemi angazhuar afërsisht 1300 efektivë nga FA. Ka mbi 1 mijë efektivë zjarrfikës që kanë punuar. 143 mjete zjarrfikës. Jemi duke punuar me 3 helikopterë prej ditësh në gjithë Shqipërinë”.

Për vatrat që janë ende aktive, Peleshi tha se, “në veri, vatra më serioze është ajo e Kukësit, ku kemi punuar dhe po punojmë kombinuar nga toka me efektivat tona dhe nga ajri me mjetin tonë me helikopterë. Nuk rrezikon banesa. Është nën kontroll, por nga çka në zonë e veriut është më seriozja. Pastaj në Luginën e Valbonës në Margegaj kemi një vatër zjarri që gjithashtu është nën kontroll”.

“Edhe vatra të tjera janë nën kontroll që janë larg zonave të banuara dhe nuk rrezikojnë banesa për momentin dhe shpresojmë që nuk do të na dalin nga kontrolli, megjithëse asnjëherë nuk mund të vëmë bast për këtë”, theksoi Peleshi.

“Kemi në Theth, kemi vatër në Vermosh të Malësisë së Madhe, kemi në Tropojë, në Betosh dhe Shëngjergj, kemi në Mirditë në fshatin Thirrë dhe Munellë. Të gjithë këto vatra janë tani nën kontroll dhe ne kemi alokuar aty trupa dhe mjete për t’i menaxhuar”, u shpreh Peleshi.

“Për të zbritur në Gjirokastër. Gjirokastra ka qenë një nga situatat më të rrezikshme që na kushtoi edhe një jetë. Dhe natyrisht, dua ta përsëris edhe një herë ngushëllimin për familjen. Bashkëshortja e të ndjerit gjithashtu është e lënduara deri tani e vetme dhe sot ndodhet e shtruar në spital. I urojmë shërim të shpejtë”, theksoi Peleshi.

“Patëm disa dëme materiale aty, sidomos kryesisht në fshatrat Arshi Lengo, Asim Zeneli, Saraqinisht lart, Krinë. Në këto fshatra, pavarësisht se vatrat janë fikur, pra zjarri është fikur, ne vazhdojmë të punojmë me një grup prej 100 efektivësh të FA për të eliminuar plotësisht vatrat dhe për të shmangur rindezjen e tyre, siç e kemi parë që ndodh rëndom edhe për shkak të kushteve atmosferike këto ditë”, tha Peleshi.

“Para pak minutash në Mashkullorë të Gjirokastrës na u desh të transferojmë një kontingjent prej 50 efektivësh, sepse në Mashkullorë kemi një vatër jashtëzakonisht të rrezikshme pranë fshatin Mashkullorë dhe era po e çon drejt fshatit. Sapo nisëm dhe një helikopter atje dhe shpresojmë në harkun prej gjysmë ore ta vendosim në kontroll”, tha ministri.

Peleshi apeloi për evakuim në këtë zonë. “Thirrje këtu për evakuim. E kam përsëritur vazhdimisht, sepse është shumë e rëndësishme që qytetarët të reagojnë në kohë, të afërmit e tyre t’i mbështesin të reagojnë në kohë, por mbi të gjitha forcat e Policisë së Shtetit. Apel edhe një herë, Policia e Shtetit nuk duhet të mendohet dy herë për t’i evakuuar njerëzit në raste të tilla, siç kemi situatën në Mashkullorë. Kjo do të na ndihmonte shumë edhe ne për të punuar dhe për t’u përballur me zjarrin”, u shpreh Peleshi.

Peleshi u shpreh se në bazën e Pashalimanit, është ngritur dhe qendra operacionale, ku tha ai, “koordinojmë në jugun e Shqipërisë veprimet, sepse jemi pranë vatrës më të rrezikshme. Ende, mbetet më e rrezikshmja”.

“Por unë kam lajm të mirë, ashtu siç ishte lajm i mirë i 163 zjarreve të shuara deri tani, kemi një lajm të mirë, jo përfundimtar, nuk jemi akoma deri aty. Këtu në Llogora, në frontin e Parkut të Llogorasë, aty ku është kufiri ku zjarri kërcënon një nga mushkëritë më të rëndësishme të Shqipërisë, padyshim të jugut të Shqipërisë, por dhe të gjithë Shqipërisë dhe një nga bukuritë më të rralla tonat, që është Parku Kombëtar i Llogorasë. Shumë trupa kanë punuar atje, shumë dedikim, shumë prej tyre më kanë prekur me sakrificën që ata bëjnë, nga ushtari i thjeshtë dhe deri tek komandantët dhe deri tek një personazh, të cilin nuk mërzitet askush në rast se e veçoj, para se të mendohemi mirë dhe të vlerësojmë siç duhet të gjithë ata që punuan. Por le të mbarojë kjo situatë njëherë. Ky është prefekti i qarkut të Vlorës, është një njeri i rrallë, është një nga ata heronj që nuk i takojmë çdo ditë. Dje e ka kaluar natën në majën e Karaburunit së bashku me trupat tona që janë natyrisht të stërvitura dhe kanë detyrë shtetërore të përballen në frontin më të vështirë. Por Prefekti është një zyrtar i shtetit, i cili ka sakrifikuar, ka kaluar natën në 1300 metra lartësi, pranë flakëve duke luftuar me flakët së bashku me efektivët tonë dhe është dita e 4-t ose 5-të pa asnjë minutë gjumë”.

“Kështu që e falënderoj publikisht me mirënjohje të jashtëzakonshme. Jam i bindur, jo vetëm në emrin tim, por dhe në emër të të gjithë shqiptarëve”, theksoi Peleshi.

Padyshim, shtoi ministri Peleshi, “Forcat tona të Armatosura, që kanë njerëz të mrekullueshëm, që kanë dedikim, që janë kokë ulur, janë heronj, të cilët nuk dalin shumë në televizion, nuk marrin shumë falënderime, sepse nuk para duken, por unë e kam për detyrë tani dhe përgjithmonë, sa herë që të kemi mundësi të më jepet rasti ta bëjë të njohur për opinionin publik se çfarë bëjnë këta njerëz që kam unë mbrapa dhe qindra e mijëra të tjerë që punojnë dhe përballen me flakët”.

“Në Llogora, strategjia është që ta mbajmë siç e kemi mbajtur këto ditë deri nesër në mëngjes në agim. Rreth orës 6 të mëngjesit është planifikuar fluturimi i dy helikopterëve të fuqishëm që vijnë si kontribut nga Holanda. Ata një kapacitet shumë më të madh sesa mjetet tona ajrore dhe sapo ata të futen në funksionim, jam i bindur se për pak orë, apo gjatë ditë së nesërme, ne do të kemi mbase dhe lajme të mira përfundimtare për shpëtimin njëherë e mirë të Parkut të Llogorasë. Deri atëherë jemi në frontin e luftës, do ta quaja unë, sepse është vërtetë një front i rrezikshëm. Kemi shumë optimizëm sot, shumë më tepër sesa dje në të njëjtën orë, që me dëme të vogla do ta menaxhojmë zjarrin”, nënvizoi Peleshi.

“Kemi njerëzit tanë më të mirë aty, kemi trupat më të mira. Kemi 60 forca speciale nën drejtimin e komandant Pëllumbit, komandantit tonë, i cili nuk është dita e parë, ka qenë disa ditë aty, e njeh mirë territorin dhe janë djem të sakrificës, djem të rrallë që misionin që u kemi dhënë, besoj do ta mbajnë me nder”, tha Peleshi.

“Kam falënderim absolutisht edhe për pilotët, janë heronj të vërtetë. Juliani dhe pilotët e tjerë, nuk po i përmend të gjithë me emër, që kanë operuar helikopterët dhe që kanë bërë një punë të pazëvendësueshme. Po aq e rëndësishme sa puna në territor, puna në tokë, puna afër zjarrit, që ndonjëherë për fat të keq ka marrë dhe nota fare të pamerituara pezhorative, nga segmente të caktuara, por kjo nuk na shqetëson absolutisht”, përfundoi ministri Peleshi.

 

Fraksion.com