Greqia hap kufijtë; Kalim pa orar nga Kapshtica

2 Korrik, 2021 admin

Drejtoria Vendore e Kufirit dhe Migracionit Korçë deklaroi sot se pika e kalimit kufitar Kapshticë, do të funksionojë 24 orë, pa orar të limituar.

Në njoftimin për shtyp, Policia e Kufitare Kapshticës ka dhënë detaje se kush do të lejohet të hyjë për në Greqi.

“Autoritetet e Policisë Greke, kanë njoftuar palën shqiptare se do të lejohet hyrja për në Greqi, për shtetasit shqiptarë me pasaportë, shtetasit me leje qëndrimi greke, shtetasit e tjerë europianë, të cilët duhet të jenë të pajisur me testin e COVID-19 dhe të kenë të plotësuar formularin e regjistrimit PLF në adresën www.travel.gov.gr”, sqaron policia.

Gjithashtu, policia thekson se “pasi të kenë marrë konfirmimin, do të lejohen për të hyrë në shtetin grek. Do të lejohen gjithashtu të hyjnë në Greqi, mjetet e tonazhit të rëndë dhe autobusa, drejtuesit e të cilëve duhet të bëjnë regjistrimin e formularit PLF dhe duhet t’i nënshtrohen një testi të shpejtë COVID-19, pranë palës greke të kësaj pike kalimi”.

Një ditë më parë, Ministria për Europën dhe Punët e Jashtme njoftoi se nga data 1 korrik do të funksionojnë gjatë 24 orëve Pikat Kufitare të Kakavisë dhe Kapshticës, për të gjitha kategoritë e udhëtarëve.

Ndërsa Pika Kufitare Qafbotë, deri më datë 7 korrik 2021 do të funksionojë në të njëjtën mënyrë si funksionon sot: nga ora 08:00 deri 16:00, me limit në hyrje 250 persona.

Vazhdon të kërkohet, PLF, PCR, Rapid test, çertifikatë vaksinimi ose vërtetim që qytetari është diagnostikuar me Covid-19 (2-9 muajt e fundit).

MEPJ informon se numri i lejuar për çdo Pikë Kufitare është:

– Kakavijë: 1500 vetë (tashmë e hapur 24 orë)

– Qafbotë: 250 vetë ( 08:00 me 16:00)

• Kapshticë: 400 vetë (24 orë e hapur).

Fraksion.com