“Shfuqizimi i pikës 3”; 34 deputetët e pavotuar: Çfarë mund të sjellë zbardhja e vendimit e GJK?

Gjykata Kushtetuese vendosi më 30.06.2021 shfuqizimin e pikës 3 të nenit 163 të Kodit Zgjedhor si të papajtueshëm me Kushtetutën. Pika e shfuqizuar thekson: “Në fillim përfitojnë mandat kandidatët që kanë marrë një numër votash parapëlqyese më të madh se herësi që del nga pjesëtimi i numrit të votave të subjektit me numrin e mandateve të fituara nga subjekti, sipas nenit 162 të këtij Kodi. Në çdo rast, herësi nuk mund të jetë më shumë se 10 000 vota. Në rast se herësi që përftohet nga pjesëtimi është një numër me mbetje dhjetore, si herës merret numri i plotë më i afërt”.

Në natyrën e vendimeve të GJK aktet e saj, sidomos ato zgjedhore, nuk kanë fuqi prapavepruese, pra përcaktojnë rregulla për të ardhmen, megjithatë mbetet për tu specifikuar vendimi i detajuar dhe pozita ligjore në raport me parlamentin e ri. Instituti i Studimeve Politike (ISP) vlerëson se vetëm zbardhja e plotë e vendimit do të përcaktojë detaje të rëndësishme, ku më kryesori është përcaktimi mbi afatet dhe efektin dhe më pas edhe mënyra sesi partitë do ta lexojnë vendimin në kundër të standardeve të zgjedhjeve dhe të reformes së ardhshme elektorale.

Pavarësisht se përbërja e parlamentit të ri nuk do të ndryshojë dhe efektet e heqjes së pragut për herësin të jetësohen në zgjedhjet e ardhshme parlamentare, publiku, media, ekspertët dhe vetë politikanët e cenuar nga ky nen, tashmë antikushtetues, do ta përdorin vendimin e GJK për të vënë në dyshim legjitimitetin e një pjese të deputetëve, të cilët nëse vendimi do të ishte aplikuar në zgjedhjet e 25 prillit, nuk do të ishin pjesë e parlamentit të ri 2021-2025.

Sa është numri i deputetëve që nuk do të ishin më deputetë nëse vendimi i Gjykatës Kushtetuese për shfuqizimin e pikës 3 të nenit 163 të ishte zbatuar nga KQZ në dhënien e mandateve nga zgjedhjet e 25 prillit? Të dhënat e përpunuara nga Instituti i Studimeve Politike (ISP) tregojnë se 34 nga 140 deputetë ose 24% e parlamentit të ri nuk do të ishin zgjedhur dhe as mandatuar si deputetë, për shkak të numrit të votave që ata kanë marrë nga qytetarët.

Tabela bashkëngjitur ilustron listën e plotë të deputetëve dhe të partive politike që do të humbnin mandatin dhe listën e deputetëve që do të fitonin mandatin nëse formula e përcaktuar nga GJK do të ishte zbatuar më 25 prill 2021.

Për lehtësi vlerësimi tabela pasqyron edhe votat e deputetëve që kanë fituar mandat për shkak të pragut mbi 10 mijë vota të herësit, si dhe votat e deputetëve që nuk kanë arritur të fitojnë mandat edhe pse janë më të votuar nga qytetarët.

Midis emrave që do të humbnin mandatin bien në sy ministrja e Mbrojtjes Olta Xhaçka, kryetari i PBDNJ Dule, numri dy në LSI Vasili, deputetë të njohur si Bushka, Felaj apo Bylykbashki, etj. tabela pasqyron të dhënat e detajuara bazuar në secilin qark. Nga deputetët që do të siguronin mandat parlamentar janë edhe emrat e njohur Majko, Kodheli apo Beqja nga PS, Spahia, Dogjani dhe Cara në PD, Spahia e Kërpaçi në LSI, etj.

Në nivel të partive politike, PS do të duhej të zëvendësonte 14 deputetë ose 18% të grupit, PD 16 deputetë ose 27% të grupit, LSI 2 nga 4 deputetë e shprehur në 50% të grupit dhe PSD 3 nga 4 deputetët, pra 67% të grupit. Në total do të humbnin mandatin parlamentar duke u zëvendësuar 34 deputetë ose 24% e numrit total të deputetëve në parlamentin e ri.

Analiza të tilla statistikore të realizuara nga ekspertët e Institutit të Studimeve Politike (ISP) në këndvështrimin e vendimit më të ri të Gjykatës Kushtetuese vlejnë për të nxjerrë në pah faktin sesi një praktikë tashmë antikushtetuese mund të tjetërsojë votën dhe vullnetin qytetar në masën 24% duke sjellë në parlament së paku 34 deputetë më pak të votuar sesa 34 të tjerë që penalizohen për shkak të sistemit zgjedhor të përcaktuar nga Kuvendi në korrik 2020.

Të dhënat janë elementë kritikë sesi partitë politike nuk kanë arritur të përfshijnë në listat e kandidimit individë me mbështetje elektorale, por kanë përdorur skema e formula taktike që sigurojnë mandate me legjitimitet të cunguar.

Të dhënat janë gjithashtu një bazë e mirë referuese për reformën e ardhshme elektorale dhe për nevojën jetike të partive politike për një sistem karriere dhe merite brenda tyre, përpara paraqitjes së listës së kandidatëve për deputetë në zgjedhjet e ardhshme parlamentare.

Instituti I Studimeve Politike (ISP)

 

NUK DO ISHTE NGA  PS               DO FITONTE NGA PS

Olta Xhaçka                                          Bledi Çomo

Edona Bilali                                           Pandeli Majko

Klotilda Bushka                                    Mimi Kodheli

Najada Como                                       Plarent Ndreca

Lavdrim Krashi                                 Dionis Ymeraj

Edona Bilali                                           Ilir Beqaj

Alban Xhelili                                    Denis Deliu

Florenc Spaho                                     Shkëlqim Bullari

Klevis Xhoxhi                                  Albana Hana

Ismet Beqiraj                                    Mirela  Pitushi
Tatiana Piro                                      Adela Hysenaj

Enslemvera Zake                                 Arian Jauplllari

Shpresa Marnoj                                   Gentian Malotaj

Ermonela Valikaj                                  Dallëndyshe Bici

 

NUK DO ISHTE NGA PD               DO FITONTE NGA PD

Oerd Bylykbashi                                Igli Cara

Vangjel Dule                                      Ivi Kaso

Albana Vokshi                                   Petrit Doda

Mesila Doda                                      Orjela Nebijaj

Flutura Açka                                     Eugen Isai

Alfred  Rrushaj                                 Asllan Dogjani

Dhurata Çupi                                    Edmond Isaku

Greta Berdeli                                       Bardh Spahia

Lindita Metaliaj                                Elda Hoti

Merita Bakiu                                    Manjola Luku

Zheni Gjergji                                    Qani Xhafa

Nusret Avdulla                                 Agron Kapllanaj

Eralda Bano                                     Eduard Sharka

Sorina Koti                                          Andrea Mano

Emilja Koliqi                                              Ludovik Hasani

Arbi Agalliu                                               Gëzim Ademaj

 

NUK DO ISHTE NGA LSI                   DO FITONTE NGA LSI

Erisa Xhixho                                                       Përparim Spahiu

Petrit Vasili                                                        Floida Kërpaci

 

NUK DO ISHTE NGA PSD               DO FITONTE NGA PSD

Meri Markici                                                 Serdar Hoxha

Gertjan Deda                                                 Besart Meta

 

Fraksion.com