Goditja ndaj krimit; Çela: Moment kyç në qasjen strategjike
Prokurori i Përgjithshëm, Olsian Çela deklaroi sot se, rekomandimet e Këshillit të Ministrave për luftën ndaj kriminalitetit janë një moment kyç në drejtim të qasjes strategjike që institucionet duhet të kenë në goditjen e krimit.
Në fjalën e tij në takimin e përcjelljes së rekomandimeve të qeverisë Prokurorit të Përgjithshëm për luftën ndaj kriminalitetit 2021, Çela theksoi se, “rekomandimet e Këshillit të Ministrave për luftën ndaj kriminalitetit kanë një rol thelbësor në drejtim të përqasjes së prioriteteve e objektivave mes ekzekutivit dhe prokurorisë duke mundësuar kështu menaxhimin e duhur të kapaciteteve njerëzore e teknike në funksion të përmbushjes së tyre”.
“Paraqitja e tyre nga Ministria e Drejtësisë në këtë takim me drejtuesit e prokurorisë përbën një moment solemn dhe domethënës ku shfaqet vullneti i përbashkët për ndërmarrjen e angazhimeve në rang institucional për koordinimin e veprimtarisë në luftën ndaj krimit”, tha Çela.
“Duke i konsideruar këto rekomandime si një moment kyç në drejtim të qasjes strategjike që institucionet duhet të kenë në goditjen e krimit, vitin e kaluar ndërmorëm masa konkrete për të rikonceptuar modelin tonë të veprimit në këtë aspekt”, shtoi ai.
“Për herë të parë u miratua udhëzimi për zbatimin e rekomandimeve të Këshillit të Ministrave, i cili u është dërguar për zbatim të gjithë prokurorive ndërkohë që u miratua edhe një plan veprimi nga ana jonë. Këto masa synuan rritjen e cilësisë së veprimtarisë së prokurorisë, me fokus marrjen e masave që do të konkretizonin këtë vullnet ndërinstitucional për realizimin e objektivave”, tha Çela.
“Përtej nivelit të arritur në zbatimin e tyre, çmoj se mbetet ende shumë për t’u bërë në drejtimin organizativ si dhe të matjes objektive të treguesve, pasqyruar kjo në raportimet periodike apo vjetore të prokurorive. Është e domosdoshme një përfshirje më e madhe e drejtuesve në ndjekjen e rekomandimeve përmes udhëzimeve të përgjithshme dhe atyre për çështje konkrete, ashtu si dhe përmes masave të tjera natyrës administrative që përveç se optimizojnë organizimin strukturor të zyrave në drejtim arritjes së zbatimit të tyre, krijojnë sisteme të brendshme të vlerësimit të zbatimit të rekomandimeve dhe impaktit në luftën ndaj kriminalitetit”, theksoi Çela.
“Nga ana jonë u forcua mekanizmi i monitorimit në drejtim të vlerësimit periodik të masave të marra nga prokuroritë dhe rezultateve të tyre. Duhet të theksoj këtu se për sistemin e prokurorisë mbetet një sfidë ndërtimi i një sistemi efikas të vlerësimit të performancës së zyrave në këtë aspekt ndaj objektiv mbetet standardizimi i sistemit të vlerësimit të masave të ndërmarra në drejtim të zbatimit të rekomandimeve nga prokuroritë, si komponent i rëndësishëm i vlerësimit të punës së drejtuesve me ndikim të drejtpërdrejtë në performancën e organit të prokurorisë”, nënvizoi Çela.
“Kjo patjetër do të ndihmohej edhe nga një rikonceptim strukturor i rekomandimeve, që merr në konsideratë një sërë faktorësh që determinojnë mundësinë reale të zbatimit të tyre por edhe që lejojnë matjen e treguesve përmes kritereve objektivë, çka do i ndihmonte të gjitha organet ligjzbatuese në përcaktimin e qartë të strategjive institucionale apo ndërinstitucionale”, u shpreh Çela.
Ai u tërhoqi vëmendjen drejtuesve të prokurorive për t’i vlerësuar maksimalisht rekomandimet dhe në vijim të hartojnë plane të qarta veprimi për ndjekjen e tyre, në zbatim edhe të udhëzimit përkatës.
Fraksion.com
