Erdoğan njoftoi zbulim të ri të rezervave të gazit në Detin e Zi
Presidenti i Turqisë, Recep Tayyip Erdoğan, njoftoi zbulimin e ri prej 135 miliardë metrash kub të gazit natyror në Detin e Zi, pas një zbulimi historik vitin e kaluar.
“Anija jonë e shpimit Fatih ka bërë një zbulim të ri të gazit natyror prej 135 miliardë metrash kub në pusin Amasra-1 në fushën e gazit Sakarya”, tha Erdoğan në ceremoninë e hapjes së Portin Filyos dhe objektit të Operimit të Gazit Natyror në Detin e Zi në provincën Zonguldak.
Duke theksuar se zbulimi i përgjithshëm i gazit natyror të Turqisë në Detin e Zi ka arritur në 540 miliardë metra kub, presidenti Erdoğan tha se aktivitetet e shpimit në rajonin e pusit Amasra-1 janë në vazhdim dhe “ne presim lajme të reja të mira nga ky rajon”.
Presidenti gjithashtu vuri në dukje se planifikojnë të sjellin gazin natyror nga deti në tokë në tre faza.
Faza e parë përfshin sistemet e prodhimit të gazit natyror që do të vendosen në shtratin e detit, tha ai, duke shtuar se faza e dytë do të përfshijë fillimin me punë të objektit që do të përpunojë gazin natyror në tokë dhe do ta bëjë të gatshëm për përdorim.
“Faza e tretë është tubacioni që do të sigurojë lidhjen midis sistemit në det dhe objektit në tokë,” vuri në dukje ai.
Anija turke e shpimit Fatih zbuloi 405 miliardë metra kub gaz natyror vitin e kaluar, në zbulimin më të madh në historinë e vendit dhe zbulimin më të madh të gazit në det të hapur në të gjithë botën në vitin 2020 në pusin Tuna-1 që ndodhet rreth 170 kilometra larg bregut të provincës turke Zonguldak.
Fatih shpoi puset e testimit Turkali-1 dhe Turkali-2 pas zbulimit të madh së bashku me pusin Amasra-1.
Prodhimi i parë i gazit nga Sakarya është planifikuar për vitin 2023.
Rreth 155 kilometra tubacion do të ndërtohet nga poshtë detit deri në Filyos në Zonguldak.
Si një vend i varur nga importi, Turqia importoi 48 miliardë metra kub gaz natyror vitin e kaluar me një rritje prej 6.5% krahasuar me vitin paraprak.
Sipas të dhënave të Autoritetit Rregullator të Tregut të Energjisë të Turqisë, prodhimi i gazit natyror të Turqisë qëndroi në 441 milionë metra kub në vitin 2020./AA
Fraksion.com
