Pas gjithë bujës në media, Gjon’s Tears ka dy fjalë të fundit për Alketa Vejsiun
Pas finales së “Eurovision”, ku Gjon’s Tears zuri vendin e tretë si përfaqësues i Zvicrës, në rrjete sociale u bë virale një intervistë që ai kishte dhënë më herët për një emision shqiptar. Artisti tregonte se si ishte refuzuar nga Festivali i Këngës në Shqipëri për të konkurruar.
“Më kërkoi këngën për 4 ditë. Edhe më tha hajde apliko dhe pastaj më thirri disa ditë më vonë dhe më tha “Më fal Gjon, jeni 22 kandidatë dhe janë 20 vende. Më fal që nuk të thashë më herët, kemi ardhur shumë vonë tek ty, kënga është frëngjisht”. Po ça është edhe më e çuditshme më tha do vish si i ftuar në Festival dhe nuk më ftoi, por s’ka problem”, tregoi Gjoni.
Në lidhje me këtë deklaratë të Gjonit, nuk vonoi edhe reagimi Alketa Vejsiut, e cila asokohe ka qenë një nga organizatoret e Festivalit të Këngës.
“Gjoni ka qenë jashtë date atëherë për pranimet, mesa mbaj mend. Unë doja shumë që Gjon të ishte pjesë. Mendoj që është një talent absolut. I kam propozuar të jetë i ftuar si “zërat e të ardhmes”. Ishin bërë zgjedhjet e artistëve dhe ishte jashtë kohe ardhja e këngës dhe për më tepër në frëngjisht. E kam kontaktuar personalisht sepse e konsideroj një talent me një zë dhe stil unik, por ishim jashtë kohe. Procedurat e RTSH-së janë pak rigoroze; kjo nuk vë në diskutim talentin e këtij artisti, të cilit uroj t’ja dëgjoj zërin sa më lart. Nëse do ta ribëja Festivalin, do ta ftoja me kënaqësi”, ka thënë Alketa.
Ndërkohë sot, Gjon’s Tears ishte i ftuar në emisionin “Wake Up” përmes një lidhje direkte dhe bëri një koment për deklaratën e Vejsiut. Gjoni tha se tashmë atij nuk i intereson më kjo histori, sepse i përket të shkuarës dhe nuk ka dëshirë që të bëjë skandale nëpër media.
“Më thënë të drejtën nuk është gjë që më intereson shumë. Nuk e kisha dëgjuar më parë deklaratën e Alketës. Unë kam bërë të pamundurën të shkoja atje dhe është gjë shumë e bukur. Nuk po them që gjithmonë kanë tentuar të më ulin poshtë apo të mos më marrin. Unë tani nuk dua të bëj skandal, asgjë, sepse nuk e kam problem. Unë arrita ta realizoja në Zvicër këtë gjë dhe jam shumë krenar që ndodhi në Zvicër dhe s’kam asnjë problem me asnjëri. Unë jam shumë i lumtur që u bë Eurovision, kështu që nuk kemi pse të bëjmë asnjë skandal. Për mua kjo është histori e vjetër, kështu që le të shkojmë përpara”, tha Gjoni.
Nëse do e merrte sërish në konsideratë pjesëmarrjen në Festivalin e Këngës apo për të përfaqësuar Shqipërinë në Eurovision, ai tha se nuk ka dëshirë që ta përjetojë sërish të njëjtën eksperiencë në festivalin europian. Gjoni u shpreh se nuk dëshiron të marrë më pjesë ne Eurovision, si këngëtar, por vetëm si kompozitor ose si tekstshkrues. Megjithatë artisti nuk e përjashtoi si mundësi, duke u shprehur “kurrë mos thuaj kurrë”.
Fraksion.com
