Alizoti: Zgjedhjet nuk duhen njohur dhe nuk do të njihen
Drejtuesi i qarkut të Beratit i Partisë Demokratike, Tomor Alizoti u shpreh sot se “zgjedhjet e 25 prillit nuk plotësuan asnjë kusht për të qenë zgjedhje”.
Në një deklaratë për mediet, Alizoti u shpreh se “në këto zgjedhje u përfshinë: krimi i organizuar, aparati shtetëror, blerja masive e votës, punësimi sezonal”.
“Përveç blerjes së votës në mënyrë masive, PS në këshillin e saj bashkiak vendosi të përdorte edhe fondin që ishte caktuar për tërmetin. Punësoi njerëz dhe kërcënoi njerëz me përjashtime nga puna. Madje, nga përvoja personale në terren, kapja e fugonit, pas shumë lajmërimesh, pas shumë shpërndarje parash dhe ndihmash në terren, arritëm ta shikonim me sytë tanë shpërndarjen e ndihmave të rezervave të shtetit, të taksapaguesve shqiptarë, thjesht për të devijuar vullnetin e popullit shqiptar, për të devijuar vullnetin e votuesve të Beratit”, tha ai.
“Po ashtu është për t’u habitur dhe për t’u çuditur që mandati i LSI-së u nda vetëm për 77 vota, ndërsa 5292 vota u shpallën të pavlefshme”, vijoi Alizoti.
“KQZ-ja e cila është përgjegjësja, nuk ka asnjë të drejtë të mohojë këto fakte të prekura, të para në terren, të dokumentuara, të provuara. Atëherë, kjo tregon që është pjesë dhe palë dhe kurrsesi nuk mund të jetë arbitër i këtyre zgjedhjeve, derisa ajo bëhet palë. Zgjedhje më 25 prill nuk pati. Zgjedhjet nuk duhen njohur dhe nuk do të njihen”, tha Alizoti.
“Kjo ishte një masakër e fuqishme, jo elektorale, por të vullnetit të një populli i cili dëshiron dhe ëndërron të jetë pjesë e BE-së, të bashkimit më të qytetëruar në botë, ku në të posedohet drejtësia, liria për të vendosur, demokracia. Demokracia është votë e lirë, individ i pavarur, liri dhe drejtësi”, përfundoi ai.
Fraksion.com
