PD vazhdon të ndalojë makinat: Kapën 3 automjete në mesnatë. Ishte edhe kryetari i PS Podgorie me zyrtarin e tatimeve
Tre makina janë ndaluar në mesnatë nga struktura e mbrojtjes së votës së PD në fshatin Podgorie me rreth 7 punonjës njësie brenda.
Dy prej makinave tip “Mercedes” dhe “Volkswagen”, të cilat drejtoheshin nga Soni Laraku dhe Andi Zaqellari u larguan me forcë, ndërsa makina e tretë e drejtuar nga administratori i Njësisë Administrative Vreshtas, Cezar Bezati dhe shoqërues Gerti Tabaku u bllokua, njofton PD.
Në terren së bashku me ta ishte dhe kryetari i PS të Podgorie dhe njëkohësisht zyrtar i tatimeve Korçë, Izmi Çoçka. Pasi u njoftua Policia, mbërritën forcat e rendit të cilët ushtruan presion për lirimin e rrugës.
Në deklaratën e PD thuhet se përfaqësuesit demokratë insistuan që makina të kontrollohej dhe kjo u arrit në orët e para të mëngjesit të sotëm. Nga kontrolli rezultoi se në makinën e administratorit u gjetën:
-Lista e zgjedhësve të fshatit Podgorie,
-Listë e patronazhit të fshatit Podgorie me patronazhist administratorin Çezar Bezati,
-Listë e shkruar me dorë me emra banorësh të këtij fshati.
PD pretendon se policia refuzon ta bëjë publike dhe ka shoqëruar makinën e administratorit Çezar Bezati dhe shoqëruesin e tij, Gerti Tabaku, të cilët janë liruar. Ndërsa janë shoqëruar për bllokim rruge edhe tre simpatizantë të PD, të cilët janë identifikuar si Ahmet Goroveci, Endrison Dushku dhe Fatjon Dushku.
Fraksion.com
