Lojërat Olimpike në Tokio pa sportdashës të huaj
Për shkak të pandemisë Covid-19 organizatorët e Lojërave Olimpike dhe Paraolimpikë të Tokios nuk do të lejojnë tifozë të huaj në vend.
Për shkak të pandemisë së koronës në Lojërat Olimpike Verore në Tokio nuk do të pranohet asnjë spektator i huaj. Vendimi ishte “i pashmangshëm”, tha presidentja e Komitetit Organizativ të Lojërave të Tokios, Seiko Hashimoto, pas një videokonference me përfaqësuesit e Komitetit Olimpik Ndërkombëtar (IOC) dhe Komitetit Paralimpik Ndërkombëtar (IPC).
“Kjo është shumë zhgënjyese dhe për të ardhur keq, por na u desh ta merrnim këtë vendim.” IOC dhe IPC e kanë “respektuar dhe pranuar plotësisht vendimin.” Për herë të parë, Lojërat Olimpike dhe Paraolimpike do të zhvillohen pa spektatorë të huaj.
Sipas një sondazhi të gazetës “Yomiuri Shimbun” në fillim të Marsit, 77 përqind e të anketuarve u shprehën kundër vizitorëve të huaj për Lojërat Olimpike.
Më shumë se gjysma e japonezëve janë aktualisht në favor të shtyrjes apo edhe anulimit të lojërave të verës, të cilat janë shtyrë tashmë për një vit.
Rreth 600.000 bileta për Lojërat Olimpike dhe rreth 300.000 bileta për Lojërat Paraolimpike janë shitur tashmë për sportdashës ndërkombëtarë. Kundrejt kërkesës paratë për biletat do të rimbursohen. Sidoqoftë kostot për fluturimet dhe akomodimet që tashmë janë rezervuar nuk mund të rimbursohen, tha drejtori menaxhues i Komitetit Organizativ të Lojërave të Tokios, Toshiro Muto.
Fraksion.com
