Arrihet marrëveshja mes Shqipërisë e Italisë për njohjen e patentave/ Xhaçka: Veprime konkrete si ky, impakti më konkret tek qytetarët

Ministrja për Europën dhe Punët e Jashtme, Olta Xhaçka po zhvillon një vizitë zyrtare në Itali, e para që pas emërimit në krye të MEPJ-së, ku u prit në një takim nga ministri për Punët e Jashtme të Italisë, Luigi Di Maio.

Xhaçka dhe Di Maio konfirmuan zyrtarisht përfundimin e procedurave për njohjen reciproke të lejeve të drejtimit të automjeteve.

“Arritëm marrëveshjen për njohjen reciproke të lejeve të drejtimit me qëllim konvertimi. Nënshkrimi i marrëveshjes do të bëhet javën e ardhshme në Tiranë mes strukturave përgjegjëse”, tha ajo.

Xhaçka tha se “veprime konkrete si ky janë impakti më konkret tek qytetarët”.

Ajo i shprehu mirënjohjen qeverisë italiane për solidaritetin dhe kontributin për rindërtimin pas ndërtimit.

Po ashtu, Xhaçka e cilësoi komunitetin arbëresh në Itali, si urë lidhëse mes dy popujve tanë.

“Nxisim bashkëpunimin ekonomik dhe shkëmbimet tregtare mes dy vendeve. Shumë shpejt nis punën Komisioni i Përhershëm Ekonomik Shqipëri – Itali”, tha ajo.

Xhaçka e cilësoi Italinë si “një avokat i palodhur i integrimit të Shqipërisë në Bashkimin Europian”.

Ndërsa ministri Di Maio tha se në zgjedhjet e 25 prillit të gjitha forcat politike në Shqipëri duhet të japin prova demokracie.

“Forcat politike të japin mesazhin se interesi kombëtar qëndron mbi interesat partiake”, tha ai.