S’ka shenja protestash rreth Kapitolit

Në Uashington, masat e sigurisë rreth Kapitolit ishin sot të rrepta, pas paralajmërimeve të policisë se një grup paraushtarak mund të përpiqej të sulmonte ndërtesën e Kongresit, për të shënuar një datë me rëndësi në kalendarin e një teorie konspirative të pabazë.

Në një njoftim të lëshuar të martën nga Departamenti i Sigurisë Kombëtare dhe Byroja Federale e Hetimit thuhej se në muajin shkurt një grup i paidentifikuar i “ekstremistëve të dhunshëm” kanë diskutuar plane për “të marrë kontrollin e Kapitolit dhe për të hequr ligjvënësit demokratë në datën 4 mars, ose rreth asaj date”.

4 Marsi është dita kur ithtarët e teorisë së konspiracionit QAnon besojnë se ish Presidenti Donald Trump, i cili u mund nga Presidenti Joe Biden në zgjedhjet e 3 nëntorit, do të betohej për një mandat të dytë në detyrë. Deri në vitin 1933, data e përurimit të presidentëve ishte 4 marsi.

Gjatë ditës së enjte, nuk pati shenja protestuesish përgjatë gardhit prej çeliku që rrethon Kapitolin që prej trazirave të 6 janarit nga mbështetësit e ish-Presidentit Trump.

Brenda gardhit, mund të shiheshin dhjetra trupa të armatosura të Gardës Kombëtare.

Sheshi Freedom Plaza, një pikë tubimi për protestat e mëparshme të elementëve të krahut të djathtë, përballë zyrës së kryetares së bashkisë së Uashingtonit, ishte e zbrazët.

Edhe trafiku në qendër të qytetit ishte i pakët dhe shiheshin pak kalimtarë.

Policia e Kapitolit i ka kërkuar Pentagonit ta zgjasë misionin e Gardës Kombëtare për mbrojtjen e Kapitolit edhe për dy muaj të tjerë, tha një zyrtar i mbrojtjes për agjencinë Reuters të enjten.

Aktualisht rreth Kapitolit ka 5200 trupa të Gardës Kombëtare dhe misioni i tyre ishte planifikuar të përfundonte më 12 mars.

PARALAJMËRIMET E ZBULIMIT

Departamenti policor i Kapitolit tha se po i merrte seriozisht paralajmërimet e shërbimeve të zbulimit për një sulm të mundshëm ndaj Kapitolit.

“Kemi bërë tashmë përmirësime të shumta në masat e sigurisë, përfshirë vendosjen e një barriere fizike dhe shtimin e kontigjentit që mbron Kongresin, publikun dhe policët,” tha departamenti përmes një deklarate. “Departamenti ynë po punon me partnerë lokalë, shtetërorë dhe federalë për të ndalur kërcënimet ndaj Kapitolit”.

Selia e Kongresit është mbrojtur gjatë javëve të fundit me ndihmën e Gardës Kombëtare dhe është rrethuar nga një perimetër i ri sigurie, që pas sulmit të 6 janarit nga përkrahës të ish-Presidentit Donald Trump, kur anëtarët e Kongresit po certifikonin fitoren e demokratit Joe Biden në zgjedhjet presidenciale.

Këtë javë FBI-ja dhe Departamenti për Sigurinë Kombëtare paralajmëruan forcat lokale të rendit se një grup ekstremist kishte bërë thirrje për grumbullim në Uashington në përpjekje për të marrë nën kontroll Kongresin.

Këto kërcënime bënë që Dhoma e Përfaqësuesve të anulonte seancat e së enjtes, ndërkohë që Senati nuk ka bërë ndryshime në axhendë.

Ligjvënësit kanë zhvilluar një numër seancash ku kanë dëgjuar nga zyrtarë dëshmi mbi ngjarjet e 6 janarit. Departamenti i Drejtësisë ka ngritur akuza ndaj më shumë se 300 vetëve për pjesëmarrjen në sulmin e dhunshëm ndaj Kapitolit ku gjetën vdekjen pesë vetë, ndër ta edhe një polic i forcës mbrojtëse të Kongresit./VOA

 

Fraksion.com