Tabaku: Viti 2020 me sprova të vështira, por shembja e Teatrit ngjarja më e keqe

Ish- deputetja e PD-së, Jorida Tabaku e konsideron vitin 2020 një vit të vështirë, por më e keqja sipas saj është shembja e Teatrit Kombëtar në mes të pandemisë.

Ajo shprehet se viti 2020 ka qenë një vit i vështirë sprovash për Shqipërinë. “Shumë ngjarje e shënjuan këtë vit, por për mua ngjarja me e keqe ishte prishja e teatrit”, shprehet Tabaku.

“Në mesin e pandemisë, kur shumica e shqiptarëve po respektonin vendimet e qeverisë për të shmangur grumbullimet e për të kufizuar përhapjen e virusit, kjo e fundit hajdutëshe vendosi të dërgojë policinë dhe makineritë e rënda që shembën godinën e Teatrit Kombëtar. Një godinë që ishte kthyer jo vetëm në një simbol të rezistencës kundër grabitësve të publikes dhe shkatërruesve të privates, por njëkohësisht edhe një simbol i traditës dhe identitetit të një qyteti të vendosur në morsën e babëzisë, një një pandemi më e hershme se sa kjo e koronavirusit”, tha  ajo.

Po ashtu, Tabaku shton se në mëngjesin e 17 majit 2020 fadromat goditën një godinë që për vite u mbrojt nga qytetarët dhe aktivistët.

“E goditën pa mëshirë, me etjen për të grumbulluar sa më shumë pushtet dhe për të skllavëruar qytetin që na rriti. Zgjodhën pikërisht 100-vjetorin e kryeqytetit për të njollosur Tiranën dhe për t’i hequr asaj një tjetër rruazë të historisë dhe identitetit. Por, pas vështirësive padyshim që vjen lehtësimi”, shprehet Tabaku.

Fraksion.com