Emërimi i Xhaçkës si ministre e Jashtme; Pompeo: Mirëpresim bashkëpunimin e mëtejshëm me të për të zgjeruar lidhjet SHBA-Shqipëri
Sekretari Amerikan i Shtetit, Mike Pompeo përshëndeti sot emërimin e Olta Xhaçka si ministre e Punëve të Jashtme të Shqipërisë.
Pompeo tha se Xhaçka ka qenë një partnere e fortë në rolin e saj të mëparshëm si ministre e Mbrojtjes.
Pompeo më tej u shpreh se, shpresojmë që të punojmë me të për të zgjeruar lidhjet SHBA-Shqipëri ndërsa Shqipëria përparon drejt BE.
“Kënaqësi të dëgjoj për emërimin e Olta Xhaçka si ministrja e re e Jashtme e Shqipërisë. Ka qenë një partnere e fortë në rolin e saj të mëparshëm si Ministre e Mbrojtjes, ndaj mirëpresim bashkëpunimin e mëtejshëm me të për të zgjeruar lidhjet SHBA-Shqipëri ndërsa Shqipëria përparon drejt BE”, u shpreh Pompeo në reagimin e tij.
Kryeministri Edi Rama emëroi dje Olta Xhaçkën në detyrën e ministres për Europën dhe Punët e Jashtme, pas dorëheqjes së ministrit në detyrë, Gent Cakaj.
Ministrja aktuale e Mbrojtjes, Olta Xhaçka, e cila është emëruar si ministre e re e Punëve të Jashtme ka falënderuar Sekretarin Amerikan të Shtetit, Mike Pompeo për fjalët e tij.
“Faleminderit Sekretari Pompeo! Këto fjalë me të vërtetë nënkuptojnë shumë! Jam krenare për miqësinë midis vendeve dhe njerëzve tanë, thellësisht mirënjohëse për mbështetjen e SHBA ndaj Shqipërisë, dhe jam e lumtur që mund të luaj një rol modest për ta bërë partneritetin tonë më të fortë!”, shprehet Xhaçka.
“Pres që të punojmë ngushtë me SHBA në zgjerimin dhe konsolidimin e partneritetit tonë strategjik më tej!”, vijon Xhaçka.
Xhaçka gjithashtu i ka uruar Vitin e Ri dhe ditëlindjen Sekretarit Amerikan të Shtetit, Mike Pompeo.
“Z. Sekretar, më lejoni t’ju uroj një Vit të Ri dhe një ditëlindje shumë të lumtur!”, tha Xhaçka.
Fraksion.com
