Zaev: Bullgaria nuk ishte fashiste, kemi histori të përbashkët

Kryeministri maqedonas, Zoran Zaev, ka deklaruar se Maqedonia e Veriut dhe Bullgaria kanë histori të përbashkët.

Në një intervistë për agjencinë bullgare të lajmeve BGNES, të publikuar të mërkurën, kreu i qeverisë maqedonase, ka përdorur një retorikë krejt ndryshe nga ajo e ditëve të kaluara, kur autoritetet në Shkup akuzonin palën bullgare për mohim të gjuhës dhe identitetit maqedonas.

“Ne kemi një histori të përbashkët. Goce Dellçev (dy vendet pretendojnë përkatësinë e tij etnike) është revolucionar si për bullgarët ashtu edhe për maqedonasit, të cilët luftuan për lirinë e Maqedonisë dhe rajonin e Edrenesë. Jugosllavia na ka ndarë dhe nëse nuk i njohim dobësitë e historisë, nuk do të jemi në gjendje të ndërtojmë të ardhmen”, tha kryeministri Zoran Zaev.

Kryeministri maqedonas gjithashtu ka mohuar që Bullgaria të ketë vepruar në anën e fashizmit në periudhën e Luftës së Dytë Botërore. “Nëse dikush i lejon vetes të nxijë Bullgarinë me propagandë në të gjithë botën, ai do të mbajë përgjegjësi dhe shteti nuk merr pjesë në këtë”, ka deklaruar Zaev duke bërë të ditur se institucionet tashmë kanë larguar 20 mbishkrime me termin “Bullgaria Fashiste”.

Deklaratat e Zaevit kanë nxitur reagimin e VMRO DPMNE-së duke i quajtur skandaloze.

“Kush ju dha atë të drejtë për të mohuar dhe rishikuar, relativizuar luftën tonë më të madhe historike, viktimat dhe kujtimet e paraardhësve tanë, rezistencën e krijuar nga shteti maqedonas brenda Jugosllavisë, pas së cilës ne kodifikuam gjuhën tonë dhe i institucionalizuam të gjitha karakteristikat tona kombëtare, kulturore dhe zakonore”, ka deklaruar kreu i opozitës maqedonase, duke kërkuar dorëheqjen e menjëhershme të kryeministrit, Zoran Zaev.

Tensionet mes Shkupit dhe Sofjes u ngritën pas bllokimit që i bëri Bullgaria nisjes së bisedimeve për anëtarësimin e Maqedonisë së Veriut në Bashkimin Evropian.

Bullgaria thotë se njeh gjuhën maqedonase dhe kombin maqedonas, por autoritetet në Shkup duhet të pranojnë se ato kanë “rrënjë bullgare”. Sofja pretendon se gjuha maqedonase është krijuar nga një dialekt i gjuhës bullgare dhe serbe, pas vitit 1945 nga Titoja, udhëheqësi i Jugosllavisë së atëhershme.

Pohimet e tilla janë hedhur poshtë në Maqedoninë e Veriut e cila së fundi kishte nisur një retorikë të ashpër ndaj zyrtarëve bullgarë.

Fraksion.com