Paqartësi rreth imunitetit ndaj COVID-19

Pavarësisht se pacientët që shërohen nga koronavirusi dhe krijojnë antitrupa ndaj sëmundjes COVID-19, që e shkakton ky virus, ata mund të mos jenë imunë nga një infektim i dytë.

Në një studim të publikuar në revistën mjekësore “Lancet” në muajin tetor, thuhet se janë dokumentuar pesë raste në botë, që tregojnë se pacientët që janë shëruar nga koronavirusi i ri, janë infektuar sërish.

Shkencëtarët tani po përpiqen të kuptojnë se çfarë do të thotë kjo për shanset që njerëzit të fitojnë imunitet ndaj COVID-19.

Studimi i publikuar në “Lancet” konfirmon se një person mund të infektohet me koronavirus dy herë, brenda një kohe të shkurtër. Studimi po ashtu gjeti se simptomat e sëmundjes mund të ishin dukshëm më të këqija gjatë infektimit të dytë.

Autori kryesor i studimit, Mark Pandori, nga Laboratori i Shëndetit Publik Shtetëror i Nevadës në Universitetin e Nevadës, rekomandoi që edhe njerëzit që ishin infektuar të vazhdonin me distancimin fizik, të bartin maska dhe të lanin duart shpesh.

“Ka ende shumë të panjohura rreth infektimeve me SARS-CoV-2 (v.j. emri shkencor i koronavirusit të ri) dhe përgjigjjes së sistemit imunitar, por gjetjet tona sinjalizojnë se infektimi i parë me koronavirus jo domosdoshmërisht mbron nga një infektim tjetër në të ardhmen”, tha Pandori, transmeton DW.

Deri më tani, përveç një rasti në Nevada edhe katër raste të tjera të ri-infektimit janë dokumentuar në botë: në Belgjikë, Holandë, Hong Kong dhe Ekuador. Vetëm pacienti në Ekuador ka pasur simptoma më serioze gjatë infektimit të dytë.

Ndërkaq, Organizata Botërore e Shëndetësisë (OBSH) ka konfirmuar se kanë të dhëna se disa persona janë ri-infektuar me koronavirus.

“Shkencëtarët po punojnë për të kuptuar rolin e sistemit imunitar gjatë infektimit të parë dhe të dytë”, thuhet në një raport të OBSH-së.

OBSH-ja thotë se shumë studime janë duke u bërë për të kuptuar se si funksionojnë antitrupat pasi një person infektohet me koronavirus. Kjo organizatë thekson se shumica e njerëzve prodhojnë antitrupa kur infektohen me koronavirusin e ri, por “megjithatë, niveli i këtyre antitrupave mund të variojë nga personat që kanë pasur simptoma të rënda të sëmundjes (ata kanë nivele më të larta të antitrupave) dhe atyre që kanë pasur simptoma më të buta ose që kanë qenë asimptomatik (që kanë nivel më të ulët të antitrupave).

Ndërkaq në Kosovë, që prej paraqitjes së rasteve të para me COVID-19 në muajin mars, autoritetet nuk kanë dokumentuar asnjë pacient që është infektuar sërish me koronavirus.

Xhevat Jakupi, mikrobiolog në Institutin Kombëtar të Shëndetësisë Publike të Kosovës, shpjegoi për Radion Evropa e Lirë se ky institucion nuk ka bërë ndonjë studim në këtë drejtim dhe se nuk kanë të dhëna specifike për këtë çështje.

Por, ai shton se ndonjë person i infektuar mund të mos zhvillojë antitrupa ose disa persona pas disa muajsh nuk kanë antitrupa në sasi të bollshme për t’u mbrojtur nga virusi andaj edhe ri-infektimi mund të ndodhë.

“Për ri-infeksionet informatat janë të limituara, por po i përcjelli edhe në botë, ka raste që lajmërohen për ri-infeksion, por shumë pak. Kjo varet prej antitrupave, por që ende nuk po dimë se për sa kohë po qëndrojnë antitrupat, disa thonë 4-8 muaj disa 9 muaj, por saktë nuk e di që ka ndonjë të dhënë. Por, duke e marrë parasysh që rastet kanë filluar nga muaji mars dhe ndonjë person që ka qenë atëherë i infektuar, mund tash të mos ketë antitrupa sikur infeksionet tjera që i kemi”, tha Jakupi.

Ndërkaq, infektologu Arben Vishaj bëri të ditur se në Kosovë asnjë rast të ri-infektimit nuk e kanë trajtuar në Klinikën Infektive të Qendrës Klinike Universitare të Kosovës.

Mikrobiologu Jakupi tregon nëse personi që ri-infektohet me virus mund të jetë shpërndarës i infeksionit.

“Në kushte të zakonshme për infeksionet tjera, infeksioni i dytë duhet të jetë me shenja më të lehta. Ashtu ndodh zakonisht, pasi që një sasi e antitrupave mund të ekzistojë ende. Megjithatë nuk po flas për koronavirusin, sepse nuk ka ende informacion. Ndërkaq sa i përket asaj nëse personi ri-infektohet, ai me kollitje dhe teshtitje mund ta shpërndajë infeksionin edhe te të tjerët. Për shembull te gripi sezonal, njerëzit vaksinohen çdo vit, por nuk është imunitet i përhershëm, 4-8 muaj mund të ndodhë që të mbron (vaksina kundër gripit sezonal), andaj mund të infektohet deri dy herë brenda vitit me grip sezonal”, tha ai.

Sidoqoftë Akiko Iwasaki nga Departamenti i Imuno-biologjisë në Shkollën e Mjekësisë të Universitetit Yale, ka thënë se studimi i rasteve të ri-infektimit ishte çelësi për zhvillimin e vaksinave.

Aktualisht, kompania amerikane Pfizer së bashku me partnerin e saj gjerman BioNTech, kanë aplikuar në Shtetet e Bashkuara, që vaksina e tyre e zhvilluar kundër koronavirusit të mund të nisë përdorimin te njerëzit. Këto kompani kanë thënë se studimet e fazës së tretë kanë treguar se vaksina është 95 për qind efektive.

Edhe kompania Moderna ka thënë se vaksina e saj është efektive mbi 90 për qind dhe se pritet që të nisë shpërndarjen e saj në fillim të vitit të ardhshëm./REL

 

Fraksion.com