Meta, Ramës: Në 25 prill s’do ketë vetëm një president “të shkalluar” por edhe 3 mln shqiptarë “të shkalluar”

Presidenti Ilir Meta vijon përgjigjet ndaj kryeministrit Edi Rama, kësaj here për deklaratën e tij i cili tha se “zgjedhja e tij si kreu i shtetit ka qenë e detyrueshme”.

Për Metën këto sulme janë tregues se nuk është blerë e as nuk është frikësuar nga Rama, por ka zgjedhur që të mbrojë kushtetutën, ashtu siç i takon një kreu të shtetit. Ai i ka rikujtuar marrëveshjen 5 qershorit për ndryshimet në Kodin Zgjedhor, (të votuara në seancën 5 tetorit) në të kundërtën paralajmëron me protesta.

“Meqënëse Kryepinoku Rilindas u justifikua për zgjedhjen e detyruar para tre vitesh të “Presidentit të shkalluar”, më duhet t’ju kujtoj të gjithë socialistëve se Ilir Meta ka mbajtur çdo premtim për mbrojtjen e Kushtetutës dhe interesit kombëtar. Unë u kam bërë të qartë se midis Pushtetit dhe Demokracisë, kam zgjedhur gjithmonë Demokracinë se pushtet ka edhe në vendet jodemokratike, ku të drejtat e qytetarëve shtypen e dhunohen. Tani ju e kuptoni se çdo njeri që nuk blihet e frikësohet prej tij është “i shkalluar”.
Bën mirë të reflektojë dhe të respektojë 5 Qershorin se përndryshe në 25 Prill do të ketë jo vetëm një President “të shkalluar”, por edhe tre milionë shqiptarë “të shkalluar” që do shkallmojnë me votë dhe çdo mjet legjitim ëndrrat e tij për të blerë e trembur popullin shqiptar për një grusht oligarkësh e banditësh”, shkruan Meta, teksa ka publikuar fjalimin e tij në Kuvend ditën që u zgjodh president.

Fraksion.com