Drejtësia në fazën e vënies në funksion të SPAK dhe zgjedhjen e drejtuesit të BKH-së

“Drejtësia ka hyrë në fazën e vënien në funksion të SPAK dhe zgjedhjen e drejtuesit të BKH”, tha sot Kreu i Këshillit të Lartë të Prokurorisë në takimin e zhvilluar sot me drejtuesen e Prokurorisë Pukë.

Në kuadër të takimeve me prokuroritë e rretheve në Republikën e Shqipërisë, kreu i Këshillit të Lartë të Prokurorisë, Gent Ibrahimi,  është ndalur ditën e mërkurë në Prokurorinë e rrethit Pukë.

I shoqëruar edhe nga anëtari i këtij këshilli, Vatë Staka, ai është pritur nga drejtuesja e kësaj prokurorie Elidiana Kasa.

Drejtuesi i Këshillit të Lartë të Prokurorisë u njoh nga afër me problematikat e prokurorisë së Pukës.

Ibrahimi dhe Staka siguruan mbështetjen e Këshillit duke i propozuar prokurorëve edhe bashkëpunim lidhur me dy rregulloret e reja sa i përket lëvizjeve paralele dhe asaj për ngritjen në detyrë.

“Drejtësia e re ka hyrë në një fazë të kompletuar me vënien në funksion të SPAK dhe zgjedhjen e drejtuesit të BKH. Tashmë na duhet të punojmë hap pas hapi për konsolidimin dhe krijimin e një besimi të plotë tek qytetarët, sa i përket punës së institucioneve të reja të drejtësisë. Qytetarët si aleatët kryesorë në luftën kundër korrupsionit dhe krimit të organizuar duhet të ndihen të mbrojtur dhe të dëgjuar dhe është detyra jonë që të gjithë së bashku të tregojmë se jemi në mbrojtje të interesit publik si dhe shtetit ligjor dhe të drejtë, ” u shpreh Ibrahimi./ata

Fraksion.com