“Ne duhet të vazhdojmë të qeverisim”; Balla: PS mbetet e vetmja forcë politike ku shumica e shqiptarëve besojnë

Kryetari i Grupit Parlamentar të Partisë Socialiste, Taulant Balla zhvilloi sot një takim me ekipet drejtuese vendore të Partisë Socialiste.

Balla theksoi se në fokus të diskutimeve janë plani organizativ, thellimi i barazisë gjinore brenda partisë më të madhe shqiptare si dhe vendosja e piketave tona strukturore për zgjedhjet e prill-majit 2021, ku siç u shpreh ai, “ne do të marrim besimin e shqiptarëve për mandatin tonë të tretë me Edi Ramën kryeministër”.

Balla vuri në dukje se gjatë takimit janë respektuar të gjitha masat e domosdoshme mbrojtëse ndaj COVID-19.

Por shtoi ai, ne duhet të jemi në komunikim të vazhdueshëm me komunitetet, sipërmarrjen, të rinjtë, fermerët, me njerëzit e thjeshtë dhe të zakonshëm.

“Në shtator duhet të vijojmë me konsultimet për buxhetet vendore. Operacioni humanitar i ndihmës për familjet në nevojë gjatë izolimit, por edhe çdo ditë më pas, ishte shprehje e diferencës së madhe të solidaritetit social, me “7×7=42”-at që përqeshnin e shajnë gjithë ditën nga televizori dhe facebook-u”, u shpreh Balla.

Dobësia e thellë e kundërshtarit, theksoi ai, nuk duhet të na vetëkënaq, duke lënë pas dore për asnjë moment organizmin/përmirësimin e strukturës së Partisë sonë në çdo cep të territorit.

“Partia Socialiste mbetet e vetmja forcë politike ku shumica e shqiptarëve besojnë përgjegjësinë qeverisëse dhe aspiratën për integrim europian. Qasja jonë ka qenë dhe mbetet e qartë, ne duhet të vazhdojmë të qeverisim me besnikëri të madhe ndaj njerëzve të zakonshëm të këtij vendi, të cilët janë aleatët tanë të vetëm”, deklaroi Balla.